Sunday, July 02, 2006

فضفضة

فضفضة
أعدت كتير محتارة اكتب ايه في أول موضوع على البلوج ... و بعدين قررت بما أن مزن بدأت بالمرأة وبسام بدأ بالسينما فواجب عليا أنا كمان ابدأ بحبة تنظير في علم النفس ، يعني هو مش علم نفس أوي بس ما علينا.
دايما كنت بحس اني في حاجة غلط ، انا وكل اللى حواليا حياتنا بالورقة والقلم ممكن تبان لطيفة جدا، عارفين نعمل صداقات، وننجح في شغلنا او دراستنا، وكتير الناس بتسقف لينا وتقول ياه أزاي شاطرين كده، واما كان حد بيقول انه مكتئب اللى حواليه دايما كانوا مستغربين، وكان دايما سؤال ليه؟؟؟ هو ايه اللي حصل ؟؟؟ وعادة ما فيش اجابة واضحة او فيه اجابة عبيطة متقنعش حد، بس الفكرة ان هو نفسه كتير بيكون مش عارف هو مكتئب ليه وايه اللي حصل؟؟؟ وساعتها الحل حاجة من الاثنين اما يقنع نفسه انه مكتئب على اي حاجة عبيطة، او انه يقنع نفسه ان كله تمام والدنيا لطيفة، بس بعد الشوية الحوار كله بيقع ويرجع يحس انها مش كده، طيب فين المشكلة.
المشكلة ان احنا مش عارفين نشوف ان فيه مشكلة، او خايفين نشوف،
يمكن تكون في الدنيا اللى ماشية بسرعة، اللى مش مديانا فرصة نستوعب اللي بيحصل، او يمكن تكون في اننا متعودناش نفكر في اي حاجة ليها علاقة بينا ( واكيد مش قصدي الشغل ولا العيلة ولا الدراسة ) لأ . ليها علاقة بينا من جوة، حاسيين بايه وشايفين الدنيا أزاي، ساعات بنكسل نعمل ده وكتير بنخاف، يمكن بنخاف علشان لو عاملناه حنشوف حاجات مش عايزين نشوفها، ومفروض يترتب عليها قرارات مش قادرين نأخدها، فيكون الحل ان احنا نعلن أن يبقي الوضع على ماهو عليه، ونسيب الدولاب مقفول زي ماهو. يعني ميكانزم دفاعي بسيط كلنا بنعمله، وبنحاول نبان أقوية واد ايه احنا متعاملين في الدنيا، ونسقط همومنا ومخاوفنا على اللى حولينا و على الدنيا العبثية والروتين والأختيارات الغلط اللى الناس بتأخدها، والناس العبيطة الغبية اللى مش فاهمة...ألخ علشان في الاخر نسبة صحة نظريتا ان كله تمام فينا والعيب برانا .. بس ده مش حقيقي.. فأن أحدث الدراسات النفسية أثبتت أن كل واحد شايف الدنيا حوليه فيها مشكلة بيكون العيب فيه مش في الدنيا أو على الأقل في الطريقة اللى بيتعامل فيها مع الدنيا.... وانا بدعي ان كلنا عدنا المشكلة دي بشكل أو باخر بس المهم نبطل نلقي اتهامات وننظر في مشاكل الاخرين.
ملحوظة: علشان محدش يفهمني غلط دى ماكنتش محاولة اني اكئبكوا ولا اني اقنعكوا ان كلوا مكتئبين، ولا هي محاولة تنظير والله ... الموضوع كله مجرد فضفضة
خلود

4 Comments:

At 8:51 AM, Anonymous mohame] said...

اه يابخت مين يقدر يقول على اللى فى قلبه و يطلعه
يا بخت مين يقدر يقول و كل واحد يسمعه

 
At 2:12 PM, Anonymous nour said...

حتى وان كانت تنظيرة يا خلود بس حقيقية وفي لغة سهلة بسيطة وبالفعل احنا كتير بنخاف نراجع انفسنا ونحاول نحدد المشكلة وعلى فكرة انا من ضمن الناس اللي بتخاف تجلس مع نفسها واصارحها بكتير من سلوكياتي وتفكيري

 
At 5:40 AM, Anonymous assem said...

يا خلود بصراحه و بسام بيكلمني انه عايز يعمل بلوج عشان الناس نتكلم فيه عن نفسها جدا و عن احلامها البسيطة فرحت جدا بس لما قريت لقيت ان السكه داخله في مقالات نقد وضع المرأه لنفسها و نقد سنيمائي طبعا اكيد مختلف عن اللي بيحصل في الندوات لانه بيوصف فعلا ردة فعل بسام او غيره عن الحجات اللي بيشوفها او اللي بيحسها بس بصراحه انا كنت عايز اشوف حد فعلا بيكتب فضفضه زيك لان ده كان تصوري عموما انا معنديش تعليق على اللي انتي كتباه بس كويس انك بتعرفي تفضفضي و او بتعرفي تبدأي منين الفضفضه لاني انا شخصيا مبقتش عارف
عاصم

 
At 6:52 AM, Blogger so7ab said...

يا عاصم والله كلنابنحاول نفضفض حتى لما بتكلم عن السينما اللى نفسى اشوفها وتبسطنى واو لم مزن بتكلم عن هى حاسه ازاى هى بتراقب نفسها اهو كلنا بنحاول وصحيح لسه الدنيا وتربيتنا ومجتمعتنا مش عارفين نخرج من مصطلحاتها وطريقة كلامها وكتباتها بس ادينا بنحاول

 

Post a Comment

Links to this post:

Create a Link

<< Home