يا تري بكرة الدور علي مين؟؟؟؟؟
اصدر مجلس الشعب قانون عقوبات النشر ، بعد الكثير من الجدل اللي اثاره القانون دة و رفض جموع الصحفيين له ، لانه يفرض قيود جديدة- دة غير الموجودة اصلا- علي حرية الصحافة
ازمة اصدار هذا القانون اثارت في عقلي كذا تساؤل ، لعل اهمها لغاية امتي ها يبقي الرئيس هو الفاعل الاساسي و الاقوي في النظام السياسي ، و لغاية امتي ها نفضل نقول عبارة " بناء علي توجيهات السيد الرئيس " ، انا عارفة ان الدستور بيسمح للرئيس بسلطات تشريعية ، بس مش ممكن كل حاجة تبدأ و تنتهي عند الرئيس ، مش ممكن يختزل النظام السياسي كله في شخص رئيس الجمهورية
الحاجة الثانية اللي فكرت فيها هي اداء نواب الحزب الوطني في مناقشة هذا القانون ، في الاول كل نواب الحزب الوطني كانوا رافضين اجراء تعديلات خاصة فيما يتعلق بمادة الذمة المالية و مادة اهانة رئيس دولة اجنبية ، و لكن الموقف دة اتغير تماما بعد " تعليمات الرئيس " بتعديل هذه المواد و بدأوا في وصلة شكر منقطعة النظير للرئيس ، ليه حتي ما قسموش نفسهم مجموعتين ، مجموعة مرنة قابلة للتفاوض و مجموعة تانية متشددة و ترفض التفاوض، حتي عشان تبان اللعبة مسبوكة واهو يبقي دليل علي الفكر الجديد ، ليه كلهم كانوا زي القطيع في الحالتين اوعي حد يقول لي الانتماء الحزبي ، الحزب الوطني شهد في العديد من الانتخابات انشقاقات متكررة بين صفوف اعضائه
الحاجة الثالثة : هي الصحف القومية علي الرغم من ان العديد من الصحفيين فيها اعترضوا علي القانون دة الا ان اللي حركهم هو علاقتهم بالحكومة و لم ينضموا للصحف المستقلة و الحزبية في احتجابهم عن الظهور يوم الاحد 9 يوليو ، كما لو القانون دة مش ها يضرهم او يطبق عليهم
يلا اهي حلقة في السلسلة امبارح القضاة و النهاردة الصحفيين ..... يا تري بكرة الدور علي مين ؟؟؟؟؟؟؟؟
المرصد الاعلامي
posted by Fatma Emam @ 4:28 AM
10 Comments:
قصدك هو لسه مين متحطش ف الدور
خلاص كده كل حاجه بقت على عينك يا تاجر
دوري
هههههههههه
فاطمة..
حاليا تقريبا مفيش بديل عن توجهات الرئيس وتدخلاته السامية..
لإن المجتمع لما يبقى ماشي باحترام القانون في تنظيم علاقات الناس، حيبقى تدخل أي باشا أو رئيس أو......
شيء مستهجن .
انما ساعات كتير الحقوق بتتاخد او بتضيع بمكالمة تلفون ..!
بلد تدار بالتليفون
في البداية عايز اقول اننا لسنا في نظام سياسي واقول اننا في نظام الهبل في الجبل لانه في واقع الامر كل المجلس النيابي المعظم لا هو ممثل عن الشعب ولا يحزنون ولا في سلطات من اساسها لان وجودها من عدمه قائم على قرار من السيد الرئيس زي القوانين اللي بيتم تعديلها والموافقة عليها باجماع اعضاء الحزب الوثني بامر مباشر عن طريق التليفون من خلال التليفون
مش عارف يا فاطمة انا حاسس ان فيه اختلاف المرة دى مش فى تدخل الرئيس بس فى ان الصحفين بيدافعو عن مهنتهم وعن نفسهم وهوده اللى مفتقداه من وجه نظرى الحركة السياسية المصرية اللى غرقانة فى القضايا الكبرى اللى بعيد عنها اساسا بس مفيش مانع كمان اقول انى مخنوق اوى من عم الابراشى وصوته العالى وتلبيس الامور اكبر من حجمها ولانه كمان بيفركنى بحالة القضاة اللى تحولت لازمة قومية اعتقد ان ده محتاجين نكلم حوليه
الواحد مش ملاحق علي أفلام الصيف
لسه من كام يوم كنا لسه بنتفرج علي فيلم "انقاذ الطالبة الاء"بطولة النجم حسني بوند
لقينا الفيلم الجديد نزل
الواحد حيقطع نفسه بقي و الا ايه؟
غادة الكاميليا:انا معاك ان كل اللي مش في ركب النظام محظوظ في الدور ، بس انا كان قصدي الضربة الجاية ها تتوجه لمين تحديدا منظمات مجتمع مدني ، اكاديميين ، رجال اعمال الاخوان، احزاب قيد الانشاء ؟؟؟؟؟
ايكورس: فال الله و لا فالك يا ايكورس ، رغما ان في اقاويل عن استحداث قانون للرقابة علي الانترنت ، يعني ها نبقي زي تونس
عبده باشا: غياب حكم القانون احد اهم المعضلات التي يعاني منها النظام السياسي المصري ، بس انا شايفة ان العيب دة ما كانش ممكن يستشري اوي كدة لو كان في حالة من المقاومة للمشكلة دي ، يعني ليه علي الرغم من ان كلنا رافضين عدم الاحتكام للقانون الا ان عند اي مشكلة تواجهنا في الرخصة ولا في تعيين نلجأ لطرق ملتوية لحل مشاكلنا وننسي اي كلام عن احترام القانون
نور : كلامك مضبوط يا نور بس السؤال اللي دايما شغلني احنا كنا فين و كل دة بيحصل كان فين كل الاصلاحيين دول ليه سكت الناس لغاية ما الوضع وصل للحالة المزرية دي
بسام : اه يا بسام في اختلاف في تكتل واضح من الصحفيين للمدافعة عن قضاياهم المهنية ، و كمان اكيد في مزايدات و خطب عنترية ، و لكن يبقي المكسب الاساسي ان ما عادش ينفع النظام يلهينا بقضايا خارجية تحت شعارات القومية و الاممية الاسلامية عن قضايانا الداخليةاللي بتمس حياتنا اليومية
كورتس : اعتقد في فيلم عن الكنيسة شغال دلوقتي ، ربنا يعتقنا من دي ابداعات !!!
على فكره دى تالت مره احب اعلق على البلوج ومعرفش يقولى هاتنشر بعد المراجعه
انا عايز اعرف هى بتعدى على مين الاول
يا جبلاوى احنا بجد معندناش اى مراجعة وهنشوف الغلطة دى اللى اكيد غير مقصودة وقول يا عم وولا يهمك . حتى احنا هنراجع
هنشوف الغلط ده ومستنين كل تعليقاتك اللى بجد بتبسطنا اوى
Your are Excellent. And so is your site! Keep up the good work. Bookmarked.
»
Post a Comment
<< Home