Sunday, May 20, 2007

مسابة ملكة جمال مصر


حاولت اتجاهل مسابقة جمال مصر علشان هو موضوع من الأول خفيف ولطيف ممكن نضحك عليه فى قاعدة او نتفرج عليه ونحكى عنه وانا شخصيا مبحبش كلام العيب والبنات اللى لابساه مايوهات
لكن الأسبوع اللى فات شفت حلقتين من برنامجين بيتكلموا عن المسابقة على أساس انها دعارة مقنعة وامهات بنات طلعت قالت دى كان فيها تجاوزات وتصرفات غير اخلاقية وان واحدة منهم قلعوها الكاش مايوه وصوروها وانهم سكتوا لاخر المسابقة علشان سمعة مصر
وردوا امهات تانية بان المنظميين أحسن ناس وكانوا بيروحوا البنات الساعة 11 وان البنات أشرف من الشرف وانهم انهاروا لما سمعوا الكلام ده وان ده هياثر على نظرة المجتمع ليهم ولاى حد هييجى يتجوز واحدة منهم..................
وتحديدا ده اللى غاظنى ان الموضوع المضحك يتحول لقضية شرف بنات مصر وسمعة بنات مصر واخلاقهم ويتحول الحوار اما دفاع عن التحرر والتحضر والبنات اللى اتعلموا يعملوا اعمال خيرية ويبقى عندهم ثقافة بسبب مسابقة ملكة جمال مصر وان دول اللى متقدميين المتحريين وكده هيعرفوا يربوا اجيال مع الوضع فى الاعتبار انهم زى الفل وكانوا بيرجعوا بدرى وامهاتهم بتتحرك معاهم فى كل مكان وان لبس المايوه عادى ومش دليل على انتهاك عفة وشرف البنات......................
أو وجهة النظر التانية من عينة الأبهات اللى بتسمح لبناتها تلبس مايوه وتبات برة البيت والبنات الحلوة تقعد فى بيتها وتورى الجمال لجوزها بس وملعون الغرب اللى خرب اخلاقنا
وانا بجد مش فاهمة ليه الحاجة البسيطة متفضلش بسيطة وتبعد عن المفاهيم الكبيرة والضخمة اللى الكل مش هيتحمل حكم الاخرين عليها وليه دايما هتظل حرية البنات تقيم بسطحية ماهى طول ماهيا بتلبس مايوه وتخرج وتتفسح فهيا حرة لكن برضه لازم ترجع بدرى وتحافظ على شرفها .......................................
حاجة سخيفة فعلا

مزن

14 Comments:

At 7:06 AM, Blogger so7ab said...

العوها الكاش مايوه ايه قلة الادب دى كل واحد يا ريت ياخد باله من كاش مايوهه بعد كده


الهجس التام هو تفسير مذهل للحلقتين بالذات بتاعة وائل الابراشى وهو بتعامل مع الموضوع بنفس طريقة تعامله مع قضايا الجاسوس

سخافة فعلا من كل الاطراف من اللى كملو فى المسابقة بس يا عينى كان بيرجعو الساعة 11 ومن اللى افشو من المسابقة وشافوها دعارة بس منسحبوش علشان سمعه مصر

بلا هطل بايخ

 
At 7:39 AM, Blogger fatma said...

مزنتي
مش عارفة ليه عاملين دوشة السنة دي ما كل سنة في مسابقات ملكات جمال و دلوقتي كمان بتتعرض لايف علي قنوات فضائية
الفكرة بالنسبة لي سخيفة و مبتذلة و فيها مهانة ..... مش ها كرر الالكلشيهات المعروفة
بس علي رأي بسام بلا هطل

 
At 10:55 AM, Blogger مـحـمـد مـفـيـد said...

العزيزه / مزن
احنا شعب عنده شيزوفرينيا
ممكن يعمل مشكله من الهوا
انا شايف انها هبل وشئ لابد من ذكره علي وسائل الاعلام لانه هبل في هبل

 
At 12:11 PM, Blogger عمرو عزت said...

ما اقدرتش اصدق أذني و لا أصدق الإبراشي و أنا باتفرج ع المسخرة دي

واضح جدا ان الموضوع معارك شخصية بين طرفين , و الإبراشي عاوز يعرف الحقيقة اللي تهم الباحثين عن الحقيقة و تهم مص و تهم العالم
مش قادر افهم يعني ايه واحدة بنتها مشتركة في مسابقة ملكة جمال تقول لك قلعوها الكاش مايوه ,والحكام بس يشوفوا بنتي , الشباب لأ !
كل اللي قدرت اميزه ان الامهات دول بلا أي أخلاق - محافظة أو متحررة - وانهم بيمارسوا ما يعرف بفرش الملاية و الشرشحة و التجريس لسبب ما
و يبدو لي أيضا أن الموضوع لا علاقة له بالتحرر او المحافظة
و المنظمين برضه مش متسقين و خايفين و علي راسهم بطحة . و الواحد منهم قاعد يتمحك و يقول لك برضه فيه ثقافة و معلومات عامة .

المسخرة الحقيقة مش في ناس اتخانقوا مع بعض لاي سبب تافه
المشكلة ان وائل الابراشي راسم الجدية و بيحاول يوصل لأدلة دامغة : هم قلعوهم الكاش مايوه و لا هم قلعوه بارادتهم الحرة .

 
At 12:41 AM, Blogger Egypt Rose said...

يا مزن يا جميلة صباح كل يوم سعيد .. انتي لسة في مرحلة الاستغراب من الشعب المصري .. على العموم المرحلة دي عدت عليا و تأكدت بعدها انه مفيش فايدة منه وانه شعب مزدوج المعايير ومن الافضل انك تعامليه معاملة الصراصير .. ده شعب ممكن الرجل يسرق و يكذب و يخون الامانة ويشهد زور و يقتل الابرياء و يقولك شرفي في (.....) واحدة ست .. تحرري من اصالة الشعب المصري لانه لم يعد اصيل وصدقيني هاتعيشي كويس جداً ومرتاحة جداً بعدها..

 
At 1:16 AM, Blogger mozn said...

بسام انا اللى ضايقنى هو اللعب على القيم المحافظة وان المجموعتين وجهين لعملة واحدة و انا مش شايفة الموضوع هطل عشان فى ناس كتير بتصدق وائل
الابراشى وبتتفرج عليه
طماطم، وحشتينى ، حتى لو شايفيين الموضوع مبتذل وفى مهانة طول السنين اللى فاتوا الا ان الموضوع السنة دى لعب على الكلمة السحرية بتاعة الشرف وسمعة مصر وهو ده الهطل

 
At 1:20 AM, Blogger mozn said...

العزيز محمد مفيد
صحيح الموضوع هبل وعمره ماستهوانى اكتب عنه قبل كده بس سامحنى المرة دى
اتغظت من الحوار
عمرو، مبسوطة انك رديت على حاجة انا كتبتها
صح هو الموضوع مسخرة بس انا شايفة ان الامهات دى عندها قيم محافظة بطلعها وتبتز بيها الكل وقت ماتحب والمنظميين كمان كله بيلعب فى نفس الملعب واحنا نتغاظ ونصدق الاستاذ وائل الباحث عن الحقيقة دائما والمذيعة العظيمة لبرنامج صبايا المهتمة بمشكلات الصبايا

 
At 1:25 AM, Blogger mozn said...

امولة صباحك سكر
انا مش مستغربة انا متغاظة وهاطق من السخافة
ومش مضايقة من الرجالة- يعنى راميت طوبتهم- مضايقة من كمية القيم المغلوطة اللى لابسانا وماشيين نتكلم عنها وحتى مش قادرين نمارسها فى حياتنا فبنزايد بيها على الاخرين عشان نحس ان
احنا كويسيين
وبصراحة عمرى ماشفت الشعب المصرى أصيل
خلينى أشوفك

 
At 4:39 AM, Anonymous Anonymous said...

معلهش سامحوني علي جهلي ممكن حد يقولي هو ايه الكاش مايوه ده

وبعدين نعامل الشعب معامله الصراصير ازاي تفتكري الجزم افضل ولا البيروسول
بتهيألي فلت العسكري افضل لأنه ينتشر ويتوغل ويستمر

 
At 4:41 AM, Anonymous Anonymous said...

معلش يا جماعة أنا معترض على حكاية الشعب المصرى يتعامل معاملة الصراصير لأنه شعب غلبان مغلوب على أمره النظام اللى ماشى فيه من 27 سنة هو اللى عمل فيه كده أنتو مش عايشين فى مصر و مش حاسين بمدى المعانة اللى بيواجها الناس اللى فوق عمالة بتسرق و تنهب و محدش بيقولهم حاجة شوفو كمية العربيات اللى تمنها يعدى 100 ألف جنيه جابو الفلوس دى منين و أحنا شباب مش لاقى 100 جنيه و الواحد بقى عنده 27 سنة لو معندناش أصالة مش كنا عملنا زى أخواننا اللى جابو العربيات اللى بى 100 ألف و بعدين فى حاجة أى موضوع بيطلع فى الأعلام و يتعمل عليه مشاكل فى حاجة هيفا لازم تعرفو أنى ده شغل حكومة يا جماعة علشان تغطى على حاجة تانية و بعدين الشعب المصرى اللى وصل 80 مليون نسمة يعمل أيه و هو عايش فوق بعضه أنزلو شوفو الزحمة أنتو بتتكلمو على حاجة أنتو مش عايشين فيها أنما أنا عايش فى القاهرة علشان أروح مشوار من المهندسين للدقى أقعد ساعة فى الطريق الأكل ملوث و المياه ملوثة و البيئة ملوثة و مفيش شغل عن نفسى بقالى 5 سنين شغال بعقد مؤقت فى هيئة حكومية خوفاً من شغل القطاع الخاص اللى ممكن لما أتجوز و أخلف فى لحظة الشركة تفلس و تمشى كل الموظفين اللى فيها و الواحد بيقبض كام 56 جنيه مرة قولت لبنت مغربية أنى بقبض 90 درهم قالتلى ده ميجبوش بنطلون جينز لو أحنا مش شعب أصيل مين يستحمل كل ده و لسه عايش و سعيد و مبسوط و مش فارقة معاه مش كنت من زمان بقيت حرامى و بالنسبة للموضوع الأساسى اللى يعمل مسابقة زى المسابقة دى أساساً البنات تبقى بنات وسخة و الأمهات كمان أمهات وسخة و اللى عمل المسابقة ناس وسخة علشان دول مدسوسين علينا من الغرب علشان يبوظو العرب و المصريين زى ما دمرو العراق عايزين يبتدو بلد بلد و طبعاً مصر و أيران أقوى دولتين فى المنطقة بعد أسرائبل طبعاً فأبتدو بأيران و الدور على مصر و بدل ما تقولو الشعب المصرى يداس عليه بالجزم زى الصراصير شوفو نفسيكم يا باقى الدول العربية اللى ربنا رزقها بفلوس و رفاهية ملهاش حدود أتحدو مع بعضيكم بدل ما تقعدو تقولو الكلام ده و على فكرة ممكن اللى ربنا بيديه للواحد ده رزقه و زى ما بيديه رزق ممكن يخده فى لحظة لو محمدش ربنا و أنا شايف كره غريب من باقيت الدول العربية للشعب المصرى عموماً أنا متأكد أنى الشعب المصرى أكتر شعب صبور فى العالم و لو أنتو بتتعاملو معاه لما يسافر علشان يدور على شغل على شكل أنه خدام للأسياد اللى شغال عندهم فده شرف كبير أنه يبقى خدام فى سبيل الحصول على رزقه اللى ربنا رزقه بيه أحسن ما يبقى قاعد و معاه ملايين و قاعد زى القلة مفيش حاجة فى دماغه و لا بيعرف يفكر و لا ليه شغل عمال يشغل الناس عنده و يدفع فلوس و هو و لا فاهم حاجة و ربنا معانا و معاكم

 
At 5:26 AM, Blogger so7ab said...

الانونوميس الاخير

احنا فعلا مش عايشين فى مصر الوضع فى المريخ مختلف تماما ياراجل

انا كمان متفق معاك فى رفض ان الشعب يتعامل معاملة الصراصير لكن بلاش كلام انتو مش حاسين ومش شايفين الزحمة بتاعة المهندسين ..زحمة المهندسين يا مؤمن

فكرة ان هيافة القضية مؤارة حكومية فده معناه ان وائل الابراشى عميل حكومى ..انا مؤلتش حاجة انت اللى قلت كده

الازمة من وجهه نظرى مش انها مؤامرة حكومية لكنها ازمة طبقة ما مسيطرة على الاعلام ونظرة تفضل هذه القضايا وتستمتع بها وتخرج فيها كل ميراثها الثقافى

بمناسة الوساخة فانا الصراحة مش شايف فرق بين الوساخة وبين صراصير اللى مكنتش عجباك فى تعليق حد عل الموضوع

اخيرا بلاش والنبى يا عم الكلام بتاع المصريين احسن ناس وافضل شعب حد قلك اننا خلايجة وكل واحد فينا جمبه بير بترول ومشغل ولاد بلدك فى الصخرة وبعدين ايه النظرة السينمائية دى ايه القدم ده يا راجل.. زى منتا عايش فى مصر احنا كمان عايشين وبلاش نبص بنظرة عنصرية كده على مجموعه من البشر تحت شعار انناشايفنهم اغبياء او قلة زى منتا قلت .برضه مفيش فرق بينها وبين صراصير خالص اللى زعلتك

 
At 6:18 AM, Blogger mozn said...

العزيز المجهول،
شكرا على الرد بس اظن انك تصورت من اسمى انى مش مصرية بس ده مش حقيقى ويمكن الاسم هو السبب فى كده
انا مش متفقة معاك فى اكتر اللى قلته لكن اهم حاجة انا شايفاه هيا ربط قضايا المراة بالقضايا القومية يعنى اما نتكلم عن مسابقة ملكات الجمال والردود عليها من منظور الشرف والاخلاق والدعارة وهيا دى الحاجات اللى فرقت معايا وعشان كده كتبت عنها يبقى لازم نتكلم عن الفقر و البطالة والحكومة اللى بتغيب الناس
لا
حل المشكلات اللى فاتت مش هتحل النظرة للشرف والاخلاق ومش لازم نتكلم عن البطالة والحكومة والزحمة والشعب اللى لا قبله ولا بعده عشان نثبت ان احنا مصريين بجد
تانى حاجة مش لازم ابقى مصرية عشان اتكلم عن مصر دى نظرة ضيقة للامور والمناقشات
وشكرا على اهتمامك وردك

 
At 6:57 AM, Anonymous Anonymous said...

أحب أسجل انى مش مع معاملة الصراصير ولا مع " الشعب المغلوب على امره " ... أنا مع " لا يصح إلا الصحيح " و شايف ان فى حاجات غلط كتير فى المسابقة دى .. و احسبوها بأى معايير سواء الدين أو الاخلاق أو حتى فيزيا التراب " لو كان فى حاجة اسمها كدة " .. حتلاقوا انها اكيد حاجة تكسف ان الانسان يتحكم عليه من خلال شياكة و جودة اللباس و السوتيان .. انا آسف بس دة رأيى .. و شايف ان الحرية و التفتح على ثقافات العالم مش معناه أبدا اننا " سواء بنات أو ولاد " نمشى عريانين على المسرح .. باعتذر مرة تانية لو كنت قلت ألفاظ ضايقت حد ... أشرف

 
At 2:11 AM, Anonymous Anonymous said...

...
...

ماهى طول ماهيا بتلبس مايوه وتخرج
وتتفسح فهيا حرة لكن برضه لازم ترجع بدرى وتحافظ على شرفها .......................................
حاجة سخيفة فعلا


مزن

posted by mozn @ 4:38 AM

===========

أي شرف هذا يا أختي !!? أحسن الله إليك .... اللهم إنا نسألك السلامة

 

Post a Comment

Links to this post:

Create a Link

<< Home