انا فرحانة اوي
ساعات باقوم الصبح قلبي حزين اطل برة الباب .... يخدني الحنين .... اللي اشتريته ابناع و لقيته ضاع ...... و اللي قبلته راح و ساب لي الحنين ...........
دة كان احساسي الفترة اللي فاتت كنت مكتئبة و حاسة ان الايام اللي جاية مش جايبة لي اي حاجة حلوة ، اه مش جايبة حاجة وحشة ، بس الحياة بقي لونها رمادي ، مش واضحة ، ما لهاش ملامح كدة ، حسيت اني وحيدة و بعيدة عن كل اللي حواليا ، حسيت اني اتبدلت ، و اني محتاجة ابيني جسور بيني و بين الناس اللي كانوا بيحسوا بيا حتي من غير ما اتكلم ، ما كانش عندي اي حيل اعمل اي حاجة ، و علي ايه اتعب نفسي ما دام كله زي بعضه يا دوب كنت باعمل الروتين اليومي و بس
كنت متشككة في كل حاجة اوي وي حاسة اني في خندق لوحدي
لكن كل دة اتغير لما لقيت دافع، حاجة تخليني اصحي الصبح و انا فرحانة اني فيا روح و اتكتب لي عمر عشان اعمل الحاجة اللي انا عايزاها و حاسة انها الحاجة اللي حاتخلي لحياتي معني و تعمل فرق
كل الكأبة اللي كانت خنقاني راحت ، حاسة اني واقفة علي ارض صلبة و اني مش لوحدي و اني كنت ظالمة كل اللي حواليا و محملهم ذنب مش ذنبهم ، انا بجد فرحانة و حاسة ان بكرة جاي و جايب لي خير و حتي لو الايام قسيت عليا شوية هالاقي اللي يقفوا جنبي .... اللي علي طول و واقفين جنبي دلوقتي بقي انا حاسة ان
العمل في الوقت دة يا صديق غير اننا عندك افتراق الطريق نبص قدامنا علي شمس احلامنا نلقاه بتشق السحاب الغميق :
فاطمة إمام ،
posted by Fatma Emam @ 10:17 AM
6 Comments:
يا عينى على وارد ماليزيا ..رغم انى كتير مبحبش الكلام ده بس بجد انتى دايما بتعملى فرق بتدينا حالة من البهجة واللطف كتير بتبقى ضايعة مبسوط اوى ان نفسيتك بقت افضل ونفسى بجد اكون بصدرلك نفس حالة اللطف اللى انتى بتعمليها
ارجعيلنا بقى متفائلة كده وياريت ميحصلش حاجة تسخف عليكى ..بحلم بكده
Malaysia ROCKS
يا بسام احرجتني و الله
انا عارفة ان انت مش بتحب البكائيات ، انا ما كانش قصدي اعمل كدة ، انا حاسة ان التجربة دي بجد فرقت معايا اوي ، اتصالحت مع حا جات كتير ، في حاجات كنت باشوفها يا ابيض و اسود ، يمكن كنت باتسامح مع الناس و باشوف افعالهم رمادي ، بس انا كنت دايما قاسية علي نفسي
ايه دة انا حاسة اني نرجسية اوي
المهم يا جنتل ، العود احمد ، رجعنا لتابوهات
عشان ما تزعلش بس
و بخصوص اللطافة و الطعامة ..... :)
السلام عليكم
فعلا كثير من الاحيان الواحد ممكن يكون متضايق ومش حاسس باي حاجة حوليه
ممكن تكون الاسباب كتيرة
وبرضوا ممكن تكون هناك دوافع كتيرة تخلي الواحد يشعر انه اتولد من جديد
اكرر عشان تدعى لاختك مزن وتبقى تسمعى الكلام وهنكمل القر اما ترجعى احسن البلد كلها هتولع
وايزاى تقولى بسام مبيحبش البكائيات
هو بس بيموت فى المراجيح
ربنا يفرحك دايما ياطماطم
egypt's son
اولا شكرل علس تعليقك و مشاركتك
انا متفقة معاك في اللي انت قلت و بس بالنسبة لي الولادة من جديد مش شئ كويس لاني اكتسبت خبرات كتيرة مش عايزة اضيعها
ممكن تكون الحالة دي اقرب لحالة تفتيح العيون ، اكتشاف حاجة جديدة ، مساحة جديدة في نفسك او حاجات حلوة في اللي حواليك
zooooooooooooona
بحبك و وحشتني
كفاية قر بقي العكوسات ابتدت يا امورة
مش كلام دة ، انا عارفة ان بسام بيلتبس ساعات بين مساحات البوح اللي بننقد فيها نفسنا و بين الكأبة المركزة بس كدة
مش عارفة اكتب عربي يا بشر
كمية غلطات املائية فظيعة تحملوني
بسام :P
سلام يا صاحبي
Post a Comment
<< Home