Monday, November 26, 2007

عزيزى الشاب ادعم ساويرس





لم اكن اتوقع اطلاقا اننى ساكتب تدونتين متاليتين داخلهم السيد المهندس الاستاذ سوايرس ولكنها الصدف القوية وهذه الحملة الضخمة اللى فجرت صفحاتى الانترنتية الخاصة من الميل وصولا بالفيس بوك اجبرتنى على الكتابة فالان تتجدد الحملة الاسلامية ضد ساويرس بالاخص بعد تصريحاته الاخيرة عن الحجاب والنقاب ووصل الامر ليضرب بقوة صفحات الانترنت فسمعت صوت هتاف شباب الاخوان يهز جهاز الكمبيوتر هزا بكلمة واحدة " كافر ..كافر ..كافر " ..اعتقد ان هذا شىء طبيعى ومتوقع ومكرر من جحافل الاخوان المسلمين بكل ميراث الحركة الرجعى والقمعى والمتخلف و من شباب الحركة الجدد من مستخدمى الانترنت ولكن ماهو غير مفهوم هو حملة مساندة ساويرس والتى انطلقت تحت شعار ادعم ساويرس وتم انشاء جروب على الفيس بوك بعنوان ادعم ساويرس وافتتح الجروب صفحته بهذه الكلمات الرقيقة والتى اترككم معها



هذا الجروب لمساندة المهندس نجيب ساويرس ومساندة لحرية الراى والتعبير و ضد القمع وحملات تدمير كل حلم مصرى جميل نعم للتنمية ولا لتخريب الاستثمار

شعار لمساندة ساويرس ..تصميم جروب ادعم ساويرس


هذا هو عنوان الجواب او افتتاحبة الجروب فماكتب على الجروب بعد ذلك غير مدهش اطلاقا نظرا لهذه البداية العطرة ...لا اود ان يفهم احد اطلاقا انى احمل عداء لنجيب ساويرس فهذه التدوينة لا تهتم اطلاقا بشخص ساويرس او اداءه الاقتصادى ولا تحمل اى تنظيرة يسارية بخصوص ساويرس ولكن هناك اكثر من نقطة الاولى انى لا افهم على الاطلاق معنى جروب يتكون خصيصا لمساندة فرد بعينه وبالاخص اذا كان السيد ساويرس القادر على دعم كل اعضاء الجروب نفر نفر ..افهم ان تخرج حملة لدعم حرية الراى والتعبير مستشهدة بواقعة ساويرس للدفاع عن حرية الراى والتعبير رغم ان ساويرس لم يتعرض اطلاقا للقمع ولم تؤثر – فى تقديرى – هذه الحملة الانترنتية على حرية ساويرس او حتى حرية قناته التى سبق وتكلمت عنها فى
التدوينة السابقة لكن ان تخرج الحملة للدفاع عن شخص ساويرس هذا شىء ملفت للغاية ..وما علاقة حرية الرأى والتعبير بتدمير كل حلم مصرى جميل وما علاقة كل ذلك بالتنمية و تخريب الاستثمار ولا مانع اطلاقا فى ربط الامر بموبنيل وحرب فودافون




النقطة الثانية وهى النقطة المفصلية فى الامر ان يتحدث زملائنا الليبراليين عن هذه العملية بمنتهى العزة والقوة معتبرين ان هذا جزء من النضال الليبرالى وهنا انا امام كارثة مفراداتها ان شباب الليبرالين بالفعل هم نتاج وتربية القومية العربية بتشخيص كل الازمات والقضايا. الكارثة الثانية ان يرتاح ضمير شباب الليبرالين بعد هذه المعركة المجهدة على صفحات الانترنت ويرون انهم بهذا الشكل يواصلون الكفاح الليبرالى والذى ارى ان هذه القضية هى ابعد مايكون عن اى نضال ليبرالى


النقطة الثالثة والاخيرة هو تحليل بسيط لهذه الحملات المضاددة وهو ان شباب الاخوان منذ مده وهو يحاول السيطرة على الكتابة على الانترنت هذا الفضاء الواسع الغير منتهى واعتقد ان هذه معركة نهايتها هياكل عظمية تجلس امام اجهزة كمبيوتر وهم يذكرونى بمقولة احمد مظهر " اى حد هيحط رجله على شبر من ارض الانترنت هيبقى مصيره الموت " ..وان بعض شباب الليبراليين وجدو فى هذه المعركة ضالتهم لاعلان تواجدهم بشكل فعال ايضا على الانترنت وهذا حق مشروع ولكنهم فى سرعة المعركة فشلو تماما فى صياغة قضيتهم بالشكل الذى يضمن لهم الدفاع عن قضية ليبرالية حقيقة تخص حرية الرأى والتعبير

كنت قد اكتفيت بذلك الكلام ولكن سرعة الاحداث تجتاحنى انا الاخر ففوجئت بمشروع بيان سينزل الاسواق قريبا لحركة مصريين ضد التمييز عبارة عن رسالة للسيد ساويرس تحمل كل الدعم والحب وتناصر مشروعاته الاقتصادية الضخمة الغريب ان المهندس عماد عطية وهو احد قيادات اليسار مع اصدار البيان ولكن مع تجنيب مشاريعه الاقتصادية من سياق البيان وانا اتفهم جدا الموقف واؤيده لكن كنت انتظر من اليسار طلب تجنيب اسم ساوريس ذاته وعدم تحويل القضية لقضية فرد لم تؤثر الحملة الاخوانية على حريته و ان تتحول لقضية تخص حرية الراى والتعبير و تخص التمييز الدينى اذا شاهد البعض الامر من هذه الزاوية وان يتحول لبيان وليس لرسالة موجهه لشخص ساويرس
















انا لن ادعم ساويرس ولكن من الممكن ان ادعم قضايا تخص حرية الراى او التمييز الدينى ويحزننى كثيرا ان يتورط بعض اليسارين فى هذه القضية بهذه الصورة ويحزنى اكثر ان يتنازل الليبراليين عن دعم خطاب سياسى ورموز سياسية ما احوجهم إليها ويتباهو برجل اعمال كما يفعل الاخوان مع خيرت الشاطر وكما تفعل الحكومة مع عز

بسام مرتضى

15 Comments:

At 1:47 AM, Anonymous Alaa said...

أنا مش فاهم حاجة خالص، لما جاتلي دعوة الجروب افتكرت تدوينتك و قلت يظهر الموضوع جد، دخلت الجروب يمكن أقدر أفهم ايه الحملة الشرسة اللي بتواجه ساويرس و معرفتش أفهم برضه.

ممكن حد يعملي ملخص؟ واضح أن قدراتي على متابعة أخبار المخروبة عن بعد محدودة.

فيه تخبيط في او تي في من أرضية أخلاقية و بس؟ و لا فيه كمان تخبيط في كونه رجل أعمال مسيحي؟ ولا فيه أكثر من كده؟

و الموضوع واصل لدرجات تستدعي التضامن بمعنى أن فيه خطوات قمعية حقيقية هتحصل ولا التضامن هنا مجرد اعلان موقف و أصلا مفيش خطر حقيقي؟

 
At 5:51 AM, Blogger مينا زكري said...

متفق معك في النقطة التي تثيرها ولكنني أتساءل... هل يمكن الفصل بين التضامن مع حرية الرأي والتعبير لشخص ما والتضامن مع الشخص نفسه؟
يعني أقصد عمليا دي تتعمل إزاي؟
يعني يتقال أنا متضامن مع حرية ساويرس وليس شخصه؟
ولا مجرد التضامن مع ساويرس - في سياق حدث معين - مفهوم منه ضمنا إنه تضامن مع موقف محدد في سياق محدد وليس مع شخص وسياسات في المطلق؟

يعني لما بنقول مثلا إننا متضامنين مع كريم عامر هل يعني هذا بالضرورة اتفاقنا مع ما يطرحه من أفكار؟
ولما نتضامن مع أبو إسلام عبد الله - مثلا -لأجل حريته هل كان يعني ذلك اتفاقنا مع أفكاره؟

بفكر معاك الحقيقة بصوت عالي... أنا جات لي الدعوة على الفيسبوك وانضممت بشكل شبه أوتوماتيكي للجروب للتعبير تحديدا عن التضامن مع حرية الرأي والتعبير ولم أفكر أن الموقف قد يفهم باعتباره دفاع عن شخص ساويرس في المطلق أو عن سياساته الاقتصادية أو غير ذلك

 
At 11:05 AM, Blogger so7ab said...

علاء

انا عايز اوضح بشكل ضخم الفرق بين التدوينة الاولى اللى كانت على قناة اوتى فى واللى كان منها محاولة فهم اعلام بروجوازى يقدم بحرفية عالية
وحتى كمان الدفاع عن قضية العرض دون التعرض لحذف مشاهد بحجة المحافظة على القيم

لكن انا مستحيل اتورط فى انى احول قضاياالحرية او العرض لشخص سوايرس واعمل سوايرس بطل الحرب والسلام
شخصيا مش شايف ان الحملة الاخوانية تؤثر على حرية ساويرس الشخصية لاكرجل اعمال ولا كمسيحى
ولكنى مممكن اشوف الموقف بصفته اداء اخوانى مكرر من الضرورى التصدى ليه

مش عارف اذا كنت وضحت كده ياعلاء ولا لأ

 
At 11:11 AM, Blogger so7ab said...

مينا

انا شايف انو اكيد ممكن لانه فيه ازمة ضخمة فى تحويل الامر لشخصى بصنع رموز اصبح رموز لحرية الراى والتعبير

ممكن بشكل الخطاب الموجه من الحملة بمعنى الالفاظ والوسائل اللى انا بركز عليها فى الحملة يعنى مثلا ناخد القضية كمثال الجروب مسموش ادعم حرية الراى والتعبير او حتى ضد قمع الاخوان

لول الجروب كان مهتم بازمة ساويرس كان ممكن بستشهد بيها فى سياق الكلام بحيث يبقى واضح انه بيدافع عن قضية بعينها

لكن تحول الامر لصور ساويرس والحديث عليه بصفته رجل التنمية والتحرر والعلمانية وكمان افكار عن كونه الاصلح لقيادة مصر هنا فيه ازمة

انا شخصيا مش مقتنع حتى بالحملات اوى اللى كانت علشان كريم ولا ابو اسلام رغم انو برضه فيه فرق بمعنى ان الضغط والحملة ممكن تاثر بشكل حقيقى فى التعامل مع الافراد دى لكن ساويرس لا اعتقد اطلاقا ان الحملة هتؤثر على وضعه وحريته
خلينا نفكر مع بعض بصوت عالى

 
At 5:27 PM, Blogger mozn said...

This comment has been removed by the author.

 
At 5:36 PM, Anonymous ِAlaa said...

يا بسام أنا مكنتش بناقش حاجة أصلا أنا فعلا بسأل ايه اللي حاصل، بس الرفيق بيسو بعتلي ايميل حكالي فيه عن حديث صحفي لساويرس اتكلم فيه عن الحجاب و تصريحات لنواب اخوان و بلاغات اثارة فتنة طائفية أمام النائب العام.

كده بقى فايتني حاجة؟

و الله بلدنا دي بقيت مسلية جدا.

 
At 4:57 AM, Blogger مينا زكري said...

خدت بالي دلوقت من عبثية البانر بتاع التضامن مع ساويرس (اللي في أول التدوينة)... بص وهو يشير بإيده الإشارة التي يفهمهاالجميع بأنها عن المال... والمفارقة عبثية جدا... نحن ندعم حرية التعبير، وندعم ساويرس... وساويرس بيشاور بإيده ويقول بفلوسي يا كلاب
:D

 
At 11:01 AM, Blogger fatma said...

سلمت يداك يا بيسو
انا بقي عندي مشكلة تانية خاااااااالص
ليه تم اختزال الاسلام في الحجاب ليه اللي يهاجم ما يسمي الاسلام اختزالا ، يهاجم الحجاب و من يافع عن الاسلام المختزل ، يدافع عن الحجاب
اطلعوا من دماغنا بقي
شعرنا و جسمنا و احنا احرار فيه
نغطيه و لا لا مش مشكلتكم
و انا شعري متغطي و ادعي ان مخي مفتح و في ناس دماغها مقفولة و شعرها باين

 
At 12:18 PM, Blogger so7ab said...

ياعلاء

البلد طبعا مسلية جدا اكيد انت مفتقد عندك كوميديا الموقف اللى بتحصل عندنا

مينا

الحملة بجد فيها ازمة فى اختيار الصور والتعبيرات ..غير طبعا ان الصورة دى بتفكرنى بعبد الحليم على لاعب الزمالك لما عمل بصوابعه كده لجمهور الاهلى وبصفتى زملكاوى فكانت ممكن تعجبنى الصورة
: )

 
At 12:20 PM, Blogger so7ab said...

طنطم

بصى انا مش مهتم اوى بالدخول فى مناقشة عن التصريحات بس بشكل سريع انا شايف ان فيه حاجات اخطر وهى انشار منظومة قيم محافظة فى الاساس فى المجتمع المصرى مشترك فيها محجبين وغير محجبين بس بجد كان كل همى فى التدوينة تحليل شكل الحملة

 
At 2:43 PM, Blogger fatma said...

فاهماك يا بسام
بس انا قصدي اشرك الناس في اللي طلع في دماغي
لحد امتيالاخوان ها يحتكرواالاسلام بقي
مفيش مسلمين غيرهم و لا ايه
و هو اللي بيعكلوه دة من الاسلام، دة مش شق لعصا الامة و تحريض علي الفتنة
الكلمة بالكلمة بكرة نلاقي مليشيا هنا و ميلشيا هناك
لا عيشنا و لا كنا لو هما بقوزا المسلمين و احنا الكفار الفاسقين
اسفة علس الحدة بس انا مفروووووووسة
كل شوية فتوي و حملة ما يشوفوا خيبتهم بقي الاول
بنيانهم يوم عن يوم بيضعف من جوة

 
At 6:19 PM, Blogger mozn said...

انا شايفة فى خلط بين موضوعيين
موضوع الحملة وشخص ساويرس
وبين موضوع الحجاب ودور الاخوان وكده
بالنسبة للموضوع التانى لا يافاطمة موضوع الحجاب مش بالسهولة دى صحيح حق البنت تغطى شعرها او متغطيش بس الحجاب فى مصر كظاهرة مش بالتسطيح ده ومش هنسطحه كده عشان نقفل الموضوع
والقيم المحافظة اكيد يابسام فى ناس كتير بس كتير من المحجبات بتخلق حواليها هالة من الاحترام لمجرد نها محجبة وانا شفتها كتير فى صحباتى
فلو هناقش موضوع الحجاب
يبقى الفكرة محددة عن كده

 
At 8:29 PM, Blogger fatma said...

ok new post about ya zoona
consider it done
well profounded idea as usaual ya amora

 
At 9:43 PM, Blogger Omar Nasr said...

s.a Fatma,
I am Omar, I am sherif abd el aziz friend
المشكلة سويرس يافندم مش بيهاجم الطرحة مثلا، لأ .. دة عامل قناه كاملة شعارها واحدة بترقص بلدي!! يعني الموضوع واضح ان الراجل عايز الناس حياءها و دينها يروح في الارض
ولا اللي يساعد على نشر العرايا على التلفزيون مش بيساعد على نشر الرذائل؟ أظن اننا متفقين في كده
أية بقة رأيك ييجي أحمد بهجت مثلا و يقول الكنايس في مصر عليت قوي، عايزين ننزله شوية... تفتكري دة كلام المفروض أي حد يسمعوا و يكون مبسوط؟
الراجل واضح في هدفة من القناة
لو في قنوات بتجيب خليط من الناس المحترمة زي عمرو خالد و غيرة عشان تحصل نهضة و ناس عايزة ترجع الحياء للمجتمع و ساويرس عايز يعمل قناة تهدم الكلام دة
تحبي تكوني مع مييين؟
ثانيا: هو معنى الدفاع عن حرية الرأي ان مايكونش لينا رأي؟ الناس اللي بتقول قاطعوا ساويرس مخدوش كام مدفع رشاش و راحوا على بيتة!
الناس بتقول خلوه يحترمنا!
وللا لازم كل واحد يهزق المحجبات نطبطب علية
واللي يتكلم نص كلمة على اللي كاشفين شعرهم نقول دول ناس تعبانة و مضادة للتطور!
مرة تانية
الناس لازم تحترم بعض
المسلم يحترم المسيحي و العكس
اللبرالي يحترم المتدين و العكس
عشان كلنا نعيش مبسوطين
و يجعلو عامر :)
السلام عليكم

 
At 12:47 AM, Blogger fatma said...

اهلا يا عمر نورتنا في تابوهات
بص انا عندي مشكلة في تحديدي نوايا الناس
انت ليه افترضت انه اللي بترقص بلدي دي عاوزة تبوز المجتمع ، ما طول عمرنا بنرقص بلدب و طول عمرنا مسلمين
انت فاكر لما عمور بن العاص قتل واحد اعلن الشهادة قبل مهلكه مباشرة ، الرسول عمل ساعتها ايه قال له انت شققت عن صدره
انت لم تشق عن صدر ساويرس
انا كمان ضد العري مش عشان انا متدينة و بس ، عشان دة تسليع للمرأة
انا كمان ضد الحجاب الاجباري و اللي بيتعامل مع الستات انهم سيئات او عورات علي الارض
مش مقتنعة ان ساويرس هدفه هدم المجتمع ، احنا خلاص قررنا ان هو دة الهدف الواجب اسقاطه،
طب ما هو عياله و عيلته بتتفرج معنا علي او تي في
انت بتروح اي نادي ها تلاقي البنات لابسين زي المديعات و زيادة كمان
مش عارفة انا مش باقتنع بالفكر التأمري
لا الاسلام في جبهة ضد حد و لا الاسلام ضعيف عشان نخاف عليه
بس احنا نقوي نفسنا و ايماننا و ربنا ها ييسر كل حاجة
ربنا اعلم ب النوايا يا عمر
و شكرا جزييييييلا علي التعليق و المشاركة و علق علي تدويناتي ان شاء الله
وصل تحياتي الطيبة لشريف

 

Post a Comment

Links to this post:

Create a Link

<< Home