Thursday, February 07, 2008

معرض القاهرة الدولي للكتاب............



امبارح رحت المعرض .. كانت المرة التانية بالنسبة لي اروح السنة دي
وفي المرتين كنت مبشرتيش حاجات لنفسي
كنت رايحة في مهمة محددة اني اشتري حاجات للجامعة
في المرة الاولي نجحت في ده
في المرة التانية مقدرتش
صعب عليا نفسي اوي اني اروح مرتين ومشتريش اي حاجة لنفسي
ودخلت في صراع نفسي عظيم.
معيش فلوس ، ومفيش اي حاجة معينة عايزة اشتريها، بس في نفس الوقت تقاليد وذكريات 6 اعوام بتطاردني
كان جوايا مشاعر كتير ملخبطة جدا
حاسة بالهبل الشديد اللي خلي معرض الكتاب بالنسبة ليا مش اكتر من ذكريات الطفولة الجميلة
ولسه لحد النهاردة مش عارفة اخرج برة ده
المعرض:
· ماشية مع بابا بسعادة شديدة، بشتري حبة حاجات غريبة، وبتفرج عليه وهو بشتري حاجات اغرب
· حبة وشوش متعودة اشوفها كل سنة في المقهي الثقافي، بيكلوا حمص الشام وهمبروجر معفن
· شلة مدرسة ثانوي واحنا اعدين تخانق انهوا صالة الاول ، واللي كان ساعات بنتهي برويات عبير ( ومحدش يتريق )
· غضبي الشديد اما فجأة بدأ الاسلامين يكتروا في المعرض، ناس لابسة جلاليب بيضا ، وبيبصولنا بقرف شديد، وكنت بقي عايزة اقولهم لأ المعرض ده بتاعنا
· شلة اعدة رياض والاعدة بلا هدف طول النهار علي السور اللي ادام سرايا 2
· بسام وعاصم اول واعرفتهم، وهما واقفين عن سور الازبكية بيعملوا حورات صحفية، وبسام بيسألني ايه رأيك في تنظيم المعرض السنة دي.
· حفلة محمود درويش ، وانبهاري الشديد بيها ، مع ديوانه " لا تعتذر عما فعلت"
· مظاهرة فلسطين و العراق ( مش فاكرة)
· وفي الاخر منظري كل سنة وانا بجري عشان الحق اجيب كتابين قبل ماامشي، وانا بعيط من الم رجليا وكأنها اخر مرة في حياتي اشتري كتب، او اني الكتابين دول هما اللي حينقذوني من الجهل .
ياااااااااااااااااه حاجات كتير اوي
بس اكتشفت امبارح اني هي دي علاقي بالمعرض ، واللي عمرها ماكان ليها اي علاقة بالكتب نفسها، ليها علاقة بس بحبة الحاجات الكتير اللي كنت بعرف نفسي من خلالها ..

ملحوظة::
امبارح بعد كل الصراع النفسي الفظيع اشتريت حاجتين:
- 11 عدد من مجلة ميكي
- وكتاب في الجغرافيا ب 250 جنيه، علي انه كتاب في علم الاجتماع ..
( وماتت متأثرة بغبائها)

5 Comments:

At 10:02 AM, Blogger abderrahman said...

مفاجأة المعرض بالنسبة لي السنة دي كانت في الكتب اللي اصدرها مدونون..كمان فرحت جدا لما لقيت كتاب اشتريته عن استقلال الجامعة، لزميلة ليا في كلية الأداب، اتفاجئت وفرحت بيه جدا
;)
**
السنة دي أول سنة اندمج مع المعرض من سنين طويلة
رغم انه النشاط الثقافي ضعيف بالمقارنة بالسنوات اللي فاتت

 
At 12:51 PM, Blogger kholoud said...

اه انا سمعت عن اكتاب ده
ده كتاب عظيم علي فكرة
مرشح لجائزة اوسكار السنة دي
بس زنبي قلي جبته منين وبكام لحسن معنديش ولا نسخة
:)

 
At 7:00 AM, Blogger citizenragab said...

هو فعلا يمكن كانت افضل حاجة في المعرض السنة دي كتب المدونون

 
At 6:36 PM, Anonymous Anonymous said...

تجربه معرض الكتاب _خد بالك من تجربه دي_ بتكون فعلا مرتبطه عندي باكتر من اني اشتري شويه كتب وخلاص بس هي فعلا بتكون تجربه في نهايه اليوم بتحس باحساس بالرضي متعرفش عن ايه او ليه بس انت بتبقي راضي ومبسوط وخلاص يعني تروح محمد ترجع راضي هههههههههه

 
At 3:02 PM, Anonymous Anonymous said...

" ماتت متأثرة بغباءها " عادة السعادة لاترتبط بالذكاء فالأمور التي نحللها بعمق احيانا تفقد مذاقها الحقيقي ولهذا تبقى أفعالنا التي تمنحنا السعادة خارج نطاق التقييم المنطقي والا فمرحبا بأن أموت سعيدا بغبائي "
على هامش المعرض " كل شخص يصنع لحظته بنفسه ومن الجميل أن يجمعنا نفس المكان والتوقيت والاتجاه وكل منا يبحث عن لحظته )
محمد الحناطي ( tah2050@hotmail.com )

 

Post a Comment

<< Home