Wednesday, January 16, 2008

حركة نسوية مترو انفاقية ِ


سيداتي انساتي ساداتي ازف اليكم بشري تكوين اول اتحاد نسوي في مترو الانفاق

متخيلة طبعا ردود الافعال ، استنوا هافهمكم من اول طق طق لحد سلامه عليكم
مترو الانفاق و خصوصا عربية الستات ممكن تشوفوا فيها شريحة عريضة من المجتمع المصري ممكن تشوفوا في مترو الانفاق، هوس الاستهلاكية و احدث انواع الموبايلات و الرنات علي الرغم من ان ركاب مترو الانفاق اغلبهم من ابناء الطبقة المتوسطة بتنوعاتها المختلفة يعني المفروض في ظل الرخاء اللي احنا فيه يصرفوا فلوسهم المرطرطة علي اساسيات زي الموبايل طبعا
و كمان ممكن تشوفوا محاكم التفتيش و الزغر و التنبيط اللي بتحصل للي مش يقولوا دعاء الركوب و بيشقوا عصا الجماعة و لا للي مش محجبات، دة غير الاستيكرات اللي اختزلت ايمان النساء في عدم نتف الحواجب او استخدام العطور ، و كمان ممكن تشوفوا مظاهر لانهيار قيم التكافل و التراحم في مجتمعنا و خاصة لما تشوفوا الامهات اللي شايلين عيالهم و لا الحوامل و لا الستات الكبار و هما واقفين و بقية القاعدين شابات في ريعان الشباب و عنفوان الصبا ، و هنا بقي الكل بينسي ان الدين المعاملة و الحديث اللي يقول افعل كما شئت كما تدين تدان
دي المظاهر العادية اللي فضلت اشوفها في المترو فترة كبيرة اوي من ايام ما كنت في الكلية و لغاية دلوقتي، الجديد بقي هي الحوارات اللي اتولدت مع تغيير موقع عربية الستات من العربية الاولي و التانية المجاورة لعربية السواق، للعربية الرابعة و الخامسة انا ما فهمتش عملوا كدة ليه و قلت عادي بقي، بس الحوارات اللي في المترو عكست لي حاجات كتيرة اوي
في البداية اوضحت لي ان التغييرات دي بسبب الحادثة اللي حصلت للمترو قبل العيد الاضحي اللي فات في اخر محطات اتجاه حلوان، و تعددت التفسيرات و التفسير اللي تبنته الستات اللي في المترو قال ايه ان الستات الوحشين المزعجين خبطوا علي السواق و ازعجوه فالرجل دخل في الحيطة ، و نسيوا ان عربيات الستات من سنة تسعو و تمانين في قفا السواق و عمر دة ما عمل اي مشكلة ، المشكلة كانت زي ما الجرايد قالت ان السواق كان لوحده من غير مساعد و بيرغي مع السواقين التانيين و مش مركز في السكة ، للامانة مش عارفة اذا كانت التحقيقات ايدت صحة الفرض دة و لا لا
المهم العربية اتنقلت يا اما لان اغلب الاصابات في الحادثة كانت في عربية الستات او لابعاد السواق عن فتنة الستات الوحشين ،
و عليه اتنقلت العربية الي العربية الرابعة و الخامسة، هيئة المترو دهنت الارض و كتبت سيدات و كمان لزقوا استيكرات بتقول ان العربيات دي للسيدات بس بتقول لمين بقي ، الرجالة طبعا احتلوا المكان الوحيد اللي فيه تمييز ايجابي للستات في مصر ، و الخناقات في العربية بقي للركب ، ياما الستات اللي قرفانة من الجليطة و الاستهبال بتاع الرجالة اللي مش محترمين نفسهم و لا القانون و كمان الرجالة اللي بيقولوا انهم ها يطردوا الستات من عربية الرجالة، اللي هي مش موجودة اصلا عربيات المترو يا مختلطة يا سيدات ،و كان في فئة تانية بقي من الستات مستفزة جدا و هي الستات اللي لابدة في ضل رجالتها حتي في المترو ، و شايفين انهم محارم لازواجهم في عربية الستات.
و من هنا بدأ الزحف المقدس، الخناقات بقي كشفت عن اساليب النساء المصريات في النضال من اجل حقوقهن اللي تعددت بين النقاش الهادئ للسب في سلسفين جدود اللي مضايقينهم الي الشباشب في مراحل متطورة، طبعا انا كنت حاسة ان ارواح الرائدات بترفرف علي العربية و اتحدت بعض الستات اخيرا من اجل النضال من اجل عربية للستات و بس و تعالت الاصوات و تناثرت القذائف الكلامية و الفعلية ، خناقة جامدة
و دة ملخص لمشاهداتي في مترو الانفاق في الكم يوم اللي فاتوا ، بجد العربية اثبتت لي ان الستات ساعات مش بس لا مباليات بضياع حقوقهن ساعات هما مصدر التمييز و ساعات هما الطوق الاخير للنجاة

فلتحيا عربية الستات حرة مستقلة
فاطمة

Labels:

7 Comments:

At 2:02 PM, Blogger Bassma said...

عاشت عاشت عربيه الستات ..

 
At 4:16 PM, Blogger صوت من مصر said...

نحن الرجال فعلا نستحق اكثر من ذلك ؟

 
At 3:38 PM, Blogger fatma said...

صوت من مصر
مش فاهمة تعليقك ممكن تستفيض و توضح اكتر
شكرا

 
At 6:58 AM, Blogger Mahmoud Emre said...

السلام عليكم ..



هو معلش الكلام اللى هقوله غريب وملهوش علاقة بالبوست ده نهائى بس مش عارف ليه عاوز اوقله ..


مبدئياً انا كنت بدور على اغنية فيلم الماجيك ( احلم وعيش الحلم ) بس انا لا كنت فاكر اسم الاغنية ولا اسم الفيلم بس فاكر شوية كلمات ف الاغنية .. المهم قولت ادور ف جووجل على جملة ( ابطال فيلم اوقات فراغ ) المهم من بين النتايج لقيت البلوجاية بتاعتك اللى عاملاها من سنتين اللى عن فيلم اوقات فراغ وعجبنى اوى البق ده (الدائرة مش مجرد شكل هندسي ، دي حالة خط غير منتهي، ما تحسش ان انت اتقدمت و لا اتأخرت ، دايما ترجع تاني للمكان اللي ابتديت منه .هو ده اللي حسيت به و انا باسمع اغنية " دواير " اللي كتبها عبد الرحمن الابنودي و غناها مروان خوري، الاغنية حلوة اوي و مؤثرة لفيلم مؤثر فيلم اوقات فراغ ) عجبنى لدرجة إنى كنت عاوز اشيد بيه ف البوست بتاعك الخاص بكده بس لقيته قديم اوى وممكن جداً ميتشافش .. فقولت ادور على اى حاجة جديدة واقول كلامى ده ..



معلش ع الرغى الكتير اللى بدون معنى ده معلش على كومنتى الغريب .. اتمنى انه ميكونش دمه تقيل ..

 
At 1:16 PM, Blogger fatma said...

محمود
ميرسي علي تعليقك
دمك مش تقيل اطلاقا :)

 
At 3:15 AM, Blogger Ellithy said...

دليل المدونات العربية
مدونة كل المدونين العرب .. جريدة كل العرب

انت مدعو للكتابة في مدونة كل العرب
مشروع الجريدة العربية
تكمن فكرة هذه المدونة في جمع اكبر قدر من المدونين العرب واقدرهم وافصلهم لكي يكتبو في مكان واحد
ذلك للحصول في النهاية على مدونة اشبه بالجريدة العربية تناقش القضا ياالعربية وخلافات العرب حيث ان كل الطوائف والبلاد مدعوة للكتابة
وقد تكون نقطة انطلاق للتفاهم والنقاش حول القضايا العربية المختلفة وتقابل وجهات النظر

للمشاركة ارسل ايميلك (بريدك الالكتروني) في تعليق على هذا المقال وسوف تتلقى دعوة للكتابة في هذه المدونة

مزايا الكتابة هنا :
للكاتب :
1- عدد اكبر من القراء
2- تحسين نتايج البحث لعناوين المقالات
3- انت كاتب وفي نفس الوقت قارئ تقرأ ما يكتبه كبار المدونين العرب
4- شهرة اكبر .. ودائما اقول ان في الاتحاد قوة وهذا هو اتحاد المدونين العرب

للقارئ :
1- القراءة للمدونين الكبار تحت صفحة واحدة
2- تجميع المدونات وجعلها مث ل جريدة الكترونية
3- سهولة الوصول للمقالات المرادة

شروط الكتابة (لن يتم التعديل لو مسح اي مقال ):
1- عدم الاساءة للاديان السماوية
2- عدم نشر مقال من اجل ربح المال او التنفع المادي ولكن الشروحات مقبولة ومرحب بها
3- عدم كتابة كلام خارج او الفاظ اباحية
4- الكتابة باللغة العربية

الفكرة تتلخص في ان كل مدون له حق الكتابة فقط بارسال ايميله في تعليق على هذه المدونة
اذا كانت لك مدونتك الخاصة فلا مانع من نسخ مقالاتك الهامة والتي تراها ترقى كي تكون في الجريدة العربية الالكترونية او مدونة كل العرب

وانا شخصيا ساكتب في مواضيع مختلفة وساهتم بتحقيق افضل نتائج للبحث والحصول على اكبر قدر من الزوار حتى تصل مقالاتك لاكبر عدد من القراء
كما ان تجمع المدونين سيجيئ بقراء اكثر وهكذا

برجاء ارسل لنا بريدك الالكتروني كي تستطيع الكتابة في هذه المدونة
ادعو الله ان تكون هذه المدونة ملفتة لنظر القراء ومحط انظار الراي العام العربي
مشروع الجريدة العربية الموحدة

كما يمكنكم اضافة مدونتكم في
دليل المدونات العربية
والله ولي التوفيق

 
At 7:24 AM, Anonymous Anonymous said...

من منطلق ان انا ضد كل أنواع التمييز
فأنا ضد عربية الستات
و ضد تمييز المرأة عن الرجل
كما أنا ضد تمييز الرجل عن المرأة. وكنت أتمنى أن تطالب امرأة واثقة من نفسها و فى قوتها .. أن تطالب بذلك
واحد كان ف أمريكا و بيحكى انه لما الأسانسير نزل قال للسيدة اللى منتظره جنبه: اتفضلى .. فما كان منها الا انها مسكته غسيل و مكوى و ديليفرى طول ماهما فى الاسانسير.. إزاى تقولى اتفضلى انت شايف نفسك اقوى .. و الا انت بتمنح و تسمح و الا ايه.. طبعا الفرق واضح .. و بما انى صايم فمش عارف افهمكم بس بيتهيأ لى وصلت..
و الا إيه!!
اتمنى من الست المصريه الجدية لا الصراخ.. و للأسف الجزء الاكبر من المشكله مش الراجل و لا الست
مش سهولة التحرش و عدم محاسبته
المشكله هى سهولة إمتهان آدمية اى حد هنا
المشكله اننا ما بنتعلمش إن فيه نص متر حواليك فى كل اتجاه ما يحقش لمخلوووووق ع الارض انه يقتحمه غير بإذنك

و لكم التحيه
مجدى الشافعى

 

Post a Comment

Links to this post:

Create a Link

<< Home