اغاني في وداني و وجداني
مش ساعات كدة ترتبط اغاني بمواقف... لما تسمع الاغنية الفلانية تفتكر حاجة معينة او حد معين
انا الايام دي مسيطرة عليا اغاني كتير اوي ، اغاني كتير و ملخبطة و بتتكلم علي حاجات كتيرة اوي
ملخبطة كدة زي دماغي فيها مليون حاجة،
لسة كنت باحكي لاصحابي اني الايام دي بتحصل لي اسعد و اتعس لحظات حياتي في نفس اليوم
اول اليوم حدث خارق يسعدني و ينتهي اليوم و انا باعيط ، كل دة و انا لسة الاغاني في وداني بتتغير مع تغير احساسي
مثلا امبارح كنت في مطعم و علقت في وداني اوي جملة في غنوة عبد الحليم "علي حسب وداد قلبي " و الجملة هي
لا ها سلم بالمكتوب .....و لا هارضي ابات مغلوب
و هاقول للدنيا يا دنيا ....... انا راجع انا راجع انا راجع للمحبوب
ساعتها حسيت ان بكرة ها يجي مهما كان النهاردة وحش اوي، اكيد في بكرة و اكيد انا هابقي اجمد و اقوي بكرة
انا زعلانة من اكتر الناس اللي بحبهم ، في غنوة بقي هي اللي في وداني ، لما بافتكرهم و تجي صورتهم في عينيا
غنوة مسلسل خالتي صفية و الدير اللي غناها محمد الحلو ، الغنوة بتقول
و كل ما نفترق .... تجمعنا الطرق
في العين احفان دموع ......و القلب بيتحرق
يا عيونها الطيبين اللي كانت رحيمة
بقيتوا ليه قاسيين ....و نظرتكم لئيمة
متسلطين عليا ...... تسقوني خوف و شك
يا اللي حاكمين عليا ..... تضيعني السكك
و كل ما التفت من همي و اتسرق
في بحر الحزن القي ...... حلمي القديم غرق
مش عارفة انا تعبانة اوي، تعباني اوي ان يوم رمادي ، حصلت لي احلي احداث الاسبوع دة ، بس برضه قلبي اتوجع و بكيت كاسات من عينيا، يا تري لو كنت حزينة بس او فرحانة بس ، كنت ارتحت ،و لا الفرح و الزعل سوا رحمة من ربنا ، و لا انا اللي مكبرة الامور و بقيت حساسة و متبطرة علي النعمة
ماذا تفعل لو كنت مكاني ؟؟؟
فاطمة
Labels: اغاني
posted by Fatma Emam @ 4:44 PM
2 Comments:
عزيزتى طمطم شكرا على كتاباتك الرائعة عارفة يا طمطم فعلا نفس اللى قولتية وارتباط موقف بأغنية معينة بيحصل فعلا بس ما طلعش من العقل الباطن ولا فكرت فيه غير لما كتبتى تحسى كده كتاباتك بترجعناشوية لوراء وتذكرنا بمواقف كتير.............
بس حابة اقولك بقى ان دوام الحال من المحال صعب اى حاجة تفضل على وتيرة واحدة حتى ولو كان فرح سبحان الله دى حكمة من ر بنا سبحانه وتعالى ان موجود كل حاجة وعكسها فرح وحزن ليل ونهار ضحك وبكاء حتى العين اللى بنشوف بيها بتفتح وتغمض مش بتفضل مثلا مفتوحة على طول ولا مغمضة على طول فانتى يا طمطم مش متبطرة على النعمة ولا حاجة بس هو الانسان لمايكون متعود طول عمره على حاجة معينة يعنى مثلا متعود على النجاح اكيد لما يحصله فشل فى اى حاجة بيحصله نوع من الصدمةوتحسى بيكون حساس حبيتين لانه مش متعود عليه اصلا بس هى الحياة كده يا بنتى يوم حلو ويوم مر وبيبقى يوم لك ويوم عليك ففى اى حال من الاحوال الحمد الله رب العرش العظيم
ولسة الابام الى جاية
Post a Comment
<< Home