انا و مترو الانفاق
حكايتي مع مترو الانفاق حكاية طويلة
من ساعة ما دخلت الجامعة في 2000 و لغاية دلوقتي و المترو مواصلتي الاساسية ، المفروض انه اكتر مواصلة عملية ، شبكته بتغطي مناطق كتير من العاصمة ، مواعيده مضبوطة ، ما بيتاثرش بزحمة الشوارع ، في عربية سيدات ترحم البنات و لو لفترة بسيطة من سخافات كتيرة ، و الاهم ان سعر تذكرته بسيط، اسعار التذاكر كانت بتتراوح من 50 قرش لغاية 75 قرش و كانت بتختلف باختلاف المسافة ، و بعدين اتوحدت تذكرة المترو و بقت ب 75 قرش بعد حادثة قطار الصعيد ، بعد اضافة تأمين علي المواصلات ، و لكن الزيادة دي ما عالجتش اي مشكلة من مشاكل المترو ، المترو لسة بيتأخر و كتير اوي بيوقف بين المحطات عشان صيانة القضبان و لسة نظام التهوية سيئ جدااااااااا ، دة طبعا غير الزحمة البشعة اللي بقت السمة الاساسية للمترو، ، دة غير غياب الميزة اللي كانت دايما بتميز المترو عن اي مكان تاني في مصر ، و هي التطبيق الفوري للقانون و احترامه ، دلوقتي من العادي جدا ان اي حد يرمي ورق في المترو و محطاته و كمان عادي قوي ان اي حد يزوغ و ما يدفعش تذكرة
و اخيرا زادت التذكرة و بقت بجنيه ، و برضه الوضع لسة سيئ و المستفز ان المترو بقي له موارد اخري غير التذاكر زي الاعلانات اللي بتلصق علي المترو كله و كمان الاعلانات اللي بتشتغل في اذاعة المترو و الاعلانات الموجودة في المحطات ، كل دة و يقولوا ان هئية المترو بتخسر 60 مليون جنيه في السنة ، طب ازاي؟
كمان ازعجني اوي توقيت زيادة اسعار التذاكر ، لانه جاء بعد رفض البرلمان لقانون خصخصة السكة الحديد، يعني من الاخر وزارة النقل كانت عاوزة فلوس و سلام تزود التذاكر علي الناس ، تبيع السكة الحديد ، المهم تجيب فلوس و السلام مش فارق الفلوس دي من اللي دافعها المستثمرين اللي ها يكسبوا و يرجعوا اللي دفعوه الطاق طاقين و لا من الطلبة و الموظفين
انا ما عنديش مشكلة ان هيئة المترو تكسب ، بس في المقابل يبقي في خدمة جيدة ، مش لازم المترو يبقي مكان للعذاب و المعاناة اليومية
فاطمة
posted by Fatma Emam @ 1:44 AM
19 Comments:
أنا مبسوطة اوى ياطماطم علشان كتبتى عن المترو بعد المعاناة الشاقة معايا فيه اول امبارح بس انا مش مشفقة عليكى ما انت ياما دبستينى فى مشاوير من النوع ده وانت كنت بتقولى شعر فى جمال المترو، ولا مش غاكرة رمضان
رغم انى مقاطع المترو من زمان علشان الملل ورغم انى منهواه عفاريت الاسفلت سائقى الميكروباص رغم كده احيانا بالدبس واركب المترو
المترو اتحول لمسخ عجيب كائن مهكع وممل وبيتعطل كتير ومن غير تهوية بس تقلايه عليه اعلانات منبره ون جوه مشغل احيانا اذاعة مش فاهم منها حاجة وكمان بيغلى حالة عبثية كده عجيبة
سيبك من المترو مفيش احسن من العفاريت
This comment has been removed by a blog administrator.
انا كمان زى بسام مقاطع المترولأنه خنقه و ممل وباحس ان الناس اللى فى المترو اللى دايما زحمه بتقتحمنى و كمان انا بحب طريق الكورنيش اوى علشان خاطر النيل اجمل حاجه فى مصر بس عارفه يا فاطمه انا زمان كنت احب اركب اخر مترو باليل خصوصا فى الشتاء بيبقى حاجه تانيه خالص وكمان بفتكر عم فؤاد حداد حديد ع الضفتين مفرود كما الوتر فى العود عبد العاطى
اصل محدش بيشتكي، ومحدش يعرف الواحد يشتكي فين لو فيه خدمة سيئة في حاجة حكومية ..
كله كوم والمكن البايظ، والناس الرخمة اللي بتيجي عايزه تعدي معاك بتذكرتك، طبعا ده مع الولاد
:(
الموضوع ببساطة هو استمرار نهب الحكومة للمواطنين وليس تقديم خدمة جيدة
لا والمشكلة اللي تغيظ ان ما حدش اعترض ..استغربت نفسي قوي لما شفت الورقة مكتوبة علي الشباك بان التذكرة بقت بجنية فقمت مطلعة ربع كمان من سكات ..حاجة نيلة
انا محبط جدا لان انهاردة وانا بركب مع عفريت من عفاريت الاسفلت ( اليكروباصات ) وانا رايح شغلى فى اكتوبر لاقيتهم ذودو الاجرة هما كمان ربع جنيه وبرضه سكت وطلعت
يلا انا محتاج ادرب على المشى بقى
الميكروباص كمان؟!؟
أعتقد ان الحكومة اختارت االوقت ده لعلمهم بانشغال الشعب في أحداث لبنان.. و سيحمد الله على الزيادة.. فهو ع الأقل الحكومة الكريمة وفرتله البترول...
مش غلابة زي الناس في لبنان....
!
ستظل الأنظمة العربية هي المستفيد الأول من استمرار حالة التوتر في المنطقة...
لنا الله
علشان كده خلوا التذكره جنيه
ربنا ينتقم منهم ومفيش بقي غير التوك التوك
ماهي الخطة ماشية ماشية هنزود الموارد يعني هنزود الموارد مترو بقي سكة حديد اسعار بنزين وسولار مش مشكلتي
ارجع واقول المنحة يا ريس... دي اللي جابتنا لورا
I'm impressed with your site, very nice graphics!
»
Your are Nice. And so is your site! Maybe you need some more pictures. Will return in the near future.
»
hi anonymouses:
your comments made me happy , i would be happier if i know your names , anyway thanks for stopping by
انا مش عارف الهجوم على المترو هيفضل لحد امتى وخصوصا ان الهجوم دة دايما بيبص على الموضوع من وجهة نظره هو كراكب
كام مرة شفنا واحنا راكبين المترو سلوكيات للركاب لا ترضى عدو ولا حبيب ومين فينا قال عيب رغم ان هذة السلوكيات تؤدى الى تعطل المترو وتلف اجزاء منه
الهجوم الدائم على الحكومه بالكلام فقط كالعاده هى طريقه سيئه لارضاء انفسنا والقاء اللوم على غيرنا دون تغير للواقع الذى نرفضه
ان الله لا يغير ما بقوم حتى يغيرو ما بأنفسهم
anonymous :
طبيعي ان انحاز للراكب لاني راكبة ببساطة شديدة
و بعدين وظيفة السلطة التنفيذية انها تطبق القوانين و في غرامات في المترو ممكن تستخدم لمعاقبة المخالفين
ياريت ترجع لعدد المصري اليوم الصادر في 30 اغسطس لتقرأ عن اهدار المال العام في الخط الثالث من مترو الانفاق
اه نسيت حاجة مش فاهمة جملة الهجوم علي الحكومة بالكلام فقط انت عندك وسائل سلمية و شرعية تانية ؟
انا عن نفسي بانقد الحكومة و اي حد تاني بشكل سلمي ، فللاسف ما اقدرش اعمل حاجة غير اني اعبر عن رأيي و بالمناسبة انا صوتت ضد حكومة الحزب
في الانتخابات الرئاسية و البرلمانية
تقدم النائب محمد خليل قويطة بطلب إحاطة إلى الدكتور أحمد نظيف رئيس الوزراء والمهندس محمد منصور وزير النقل، يتهم فيه الحكومة بإهدار 20 مليار جنيه في عملية إنشاء الخط الثالث لمترو الأنفاق الذي سيبدأ من العتبة وينتهي في مطار القاهرة.
أوضح قويطة أن العديد من خبراء الأنفاق حذروا من إهدار هذه المليارات في مشروع لا طائل من ورائه خصوصًا بعد أن أكدوا أن حفر كيلومتر أنفاق في هذه المسافة يتكلف مليار جنيه، في حين أن إحياء خط مترو العتبة السطحي وتطويره وصولا إلى منطقة شيراتون المطار لا تزيد تكلفته عن 50 مليون دولار.
وطالب النائب بوقف تنفيذ الخط الثالث لمترو الأنفاق انتظارًا لإجراء دراسات جدوى حول إنشاء هذا الخط الذي رفضت العديد من الجهات الدولية تمويله، بسبب وجود مشاكل فنية تعيق سرعة الانتهاء منه.
وأشار إلى أنه أبلغ رئيس لجنة النقل والمواصلات حمدي الطحان بطلبه عقد جلسات طارئة لمناقشة هذا الأمر العاجل، بدلاً من إهدار هذه المليارات العشرين والاستفادة منها في مشروعات أخرى ذات عائد تنموي.
السادات: الخط الثالث.. إهدار للمال العام
تقدم طلعت السادات عضو مجلس الشعب بطلب احاطة عاجل عن الفوضي والعشوائية في تخطيط وتنفيذ خطوط مترو الأنفاق وخاصة الخط الثالث والذي كان مخططا له أن يبدأ من امبابة الي العتبة وينتهي بالدراسة.. وتم تعديل المسار ليكون امبابة العتبة المطار. وذلك لربط المطار بوسط المدينة.
قال ان المكان مربوط فعليا بوسط المدينة بمترو النزهة "مصر الجديدة" ويبدأ من ميدان رمسيس وينتهي عند مساكن الشيراتون.
اقترح النائب أنه يمكن مده لمحطة واحدة ليصبح داخل المطار.
أكد أن تطوير هذا الخط سطحيا يتكلف 700 مليون جنيه بينما تنفيذ خط العتبة حتي المطار يتكلف 5.22 مليار جنيه.. وتساءل عن سر اهدار كل هذه الأموال خاصة وان تنفيذ الحفر في الخطوط الأربعة يتكلف 97 مليار جنيه بينما تطوير الخطوط السطحية يتكلف 6 مليارات جنيه.
قال النائب لماذا الاصرار علي اسناد التخطيط والتنفيذ لشركات فرنسية وما الحقيقة في أن السلطات الفرنسية تحقق الآن مع موظفين فرنسيين في الشركة الفرنسية لأنهم قدموا أموالا لمسئولين مصريين في عمليات تنفيذ خطوط مترو الأنفاق..!
Post a Comment
<< Home