حركة نسوية مترو انفاقية ِ
سيداتي انساتي ساداتي ازف اليكم بشري تكوين اول اتحاد نسوي في مترو الانفاق
متخيلة طبعا ردود الافعال ، استنوا هافهمكم من اول طق طق لحد سلامه عليكم
مترو الانفاق و خصوصا عربية الستات ممكن تشوفوا فيها شريحة عريضة من المجتمع المصري ممكن تشوفوا في مترو الانفاق، هوس الاستهلاكية و احدث انواع الموبايلات و الرنات علي الرغم من ان ركاب مترو الانفاق اغلبهم من ابناء الطبقة المتوسطة بتنوعاتها المختلفة يعني المفروض في ظل الرخاء اللي احنا فيه يصرفوا فلوسهم المرطرطة علي اساسيات زي الموبايل طبعا
و كمان ممكن تشوفوا محاكم التفتيش و الزغر و التنبيط اللي بتحصل للي مش يقولوا دعاء الركوب و بيشقوا عصا الجماعة و لا للي مش محجبات، دة غير الاستيكرات اللي اختزلت ايمان النساء في عدم نتف الحواجب او استخدام العطور ، و كمان ممكن تشوفوا مظاهر لانهيار قيم التكافل و التراحم في مجتمعنا و خاصة لما تشوفوا الامهات اللي شايلين عيالهم و لا الحوامل و لا الستات الكبار و هما واقفين و بقية القاعدين شابات في ريعان الشباب و عنفوان الصبا ، و هنا بقي الكل بينسي ان الدين المعاملة و الحديث اللي يقول افعل كما شئت كما تدين تدان
دي المظاهر العادية اللي فضلت اشوفها في المترو فترة كبيرة اوي من ايام ما كنت في الكلية و لغاية دلوقتي، الجديد بقي هي الحوارات اللي اتولدت مع تغيير موقع عربية الستات من العربية الاولي و التانية المجاورة لعربية السواق، للعربية الرابعة و الخامسة انا ما فهمتش عملوا كدة ليه و قلت عادي بقي، بس الحوارات اللي في المترو عكست لي حاجات كتيرة اوي
في البداية اوضحت لي ان التغييرات دي بسبب الحادثة اللي حصلت للمترو قبل العيد الاضحي اللي فات في اخر محطات اتجاه حلوان، و تعددت التفسيرات و التفسير اللي تبنته الستات اللي في المترو قال ايه ان الستات الوحشين المزعجين خبطوا علي السواق و ازعجوه فالرجل دخل في الحيطة ، و نسيوا ان عربيات الستات من سنة تسعو و تمانين في قفا السواق و عمر دة ما عمل اي مشكلة ، المشكلة كانت زي ما الجرايد قالت ان السواق كان لوحده من غير مساعد و بيرغي مع السواقين التانيين و مش مركز في السكة ، للامانة مش عارفة اذا كانت التحقيقات ايدت صحة الفرض دة و لا لا
المهم العربية اتنقلت يا اما لان اغلب الاصابات في الحادثة كانت في عربية الستات او لابعاد السواق عن فتنة الستات الوحشين ،
و عليه اتنقلت العربية الي العربية الرابعة و الخامسة، هيئة المترو دهنت الارض و كتبت سيدات و كمان لزقوا استيكرات بتقول ان العربيات دي للسيدات بس بتقول لمين بقي ، الرجالة طبعا احتلوا المكان الوحيد اللي فيه تمييز ايجابي للستات في مصر ، و الخناقات في العربية بقي للركب ، ياما الستات اللي قرفانة من الجليطة و الاستهبال بتاع الرجالة اللي مش محترمين نفسهم و لا القانون و كمان الرجالة اللي بيقولوا انهم ها يطردوا الستات من عربية الرجالة، اللي هي مش موجودة اصلا عربيات المترو يا مختلطة يا سيدات ،و كان في فئة تانية بقي من الستات مستفزة جدا و هي الستات اللي لابدة في ضل رجالتها حتي في المترو ، و شايفين انهم محارم لازواجهم في عربية الستات.
و من هنا بدأ الزحف المقدس، الخناقات بقي كشفت عن اساليب النساء المصريات في النضال من اجل حقوقهن اللي تعددت بين النقاش الهادئ للسب في سلسفين جدود اللي مضايقينهم الي الشباشب في مراحل متطورة، طبعا انا كنت حاسة ان ارواح الرائدات بترفرف علي العربية و اتحدت بعض الستات اخيرا من اجل النضال من اجل عربية للستات و بس و تعالت الاصوات و تناثرت القذائف الكلامية و الفعلية ، خناقة جامدة
و دة ملخص لمشاهداتي في مترو الانفاق في الكم يوم اللي فاتوا ، بجد العربية اثبتت لي ان الستات ساعات مش بس لا مباليات بضياع حقوقهن ساعات هما مصدر التمييز و ساعات هما الطوق الاخير للنجاة
فلتحيا عربية الستات حرة مستقلة
فاطمة
Labels: ايام
posted by Fatma Emam @ 5:50 PM
7 comments
