Wednesday, December 03, 2008

في مقتل هبة ونادين .. مش مهم انهم اتقتلوا

لن انكر أن القضية في البداية أثارت اهتمامي من باب الفضول الانساني الطبيعي اللي بيحاول يحل لغز قضية
ومكنتش اتخيل انني ممكن أكتب عنهاكمان منكرش اني من خلال حس المواطن المصري الطبيعي لم اصدق الحدوتة اللي اتحكت من الشرطة عن الولد اللي قتلهم بغرض السرقة
باعتبار انني مثلي مثل كل المواطنين اثق ان الحكومة كاذبة إلي أن يثبت العكسوطبعا العكس عمره ما حيثبت المهم
كنت اعدة امام التليفزيون فرض عليا من امي وجدتي مشاهدة البيت بيتك
واللي كانت مستضيف اللواء معرفش مين رئيس مباحث 6 أكثوبر
واللي اعد يحكي علي الدلائل المؤكده اللي مفيش حاجة منها مؤكد واللي برضوا انا مش مهتمة بيها هنا
بس بجد اللي صدمني او وخضني هو انهاء الفقرة بتليفون من والد نادين واللي عمل حوار اد كده صدام
نبدأ والد ناين بالسلام عليكم ورحمة الله وبراكاته
وحشر في النص حلفان برب الكعبة والصلاة علي النبي والحمد والشكر لوزارة الداخلية ليه عشان اثبتوا براءة وشرف بنته
وانها مكنتش فاسدة مع انها عايشة لوحدها
وانهي المكالمة بطلب ان يقول رئيس المباحث امام الجمهور ما قاله له صباحا
اللي قالوا بنتك شريفة وكويسة واي بيت يتشرف بيها
للحظة نسيت ان البنت اتقتلت وحسيت انهم بيدورا لها علي عريس
وافتكرت تاني اما اكمل السيد اللواء ان الطبيب الشرعي اثبت انها بيت بنوت وان كل اصدقاء الاب كانوا بيبركوله ويهنئوا امام النيابة ...
بنته طلعت عزراء بجد ..
... ملعون ابوا ده مجتمع اللي خلي كل اللي فارق مع اب بينتوا اتقتلت من اسبوع ان بيتوا طلعت عزراء
وملعون ابوا ده مجتمع اللي حيفضل يحاسب البنات علي عزريتها وهي عايشة وهي ميتة
مش مهم انها اتقلت.. المهم انها عزراء

Monday, December 01, 2008

كل الاجابات خاطئة

اد ايه اتوجعت لما لقيت خالتو بتقلي بعد كل اللي هي عملته في حياتها ده
كل القرارات الثورية جدا اللي عرفت تأخدها
انها بتقلي " أهم يوم في حياة البنت يوم فرحها ولو ملبستيش فستان ابيض وطرحة حتفضلي ندمانة طول عمرك
".......
ملعون ابوه ده مجتمع ودي دنيا
هو احنا اللي هبل .. ولا ايه الموضوع
اعدت افتكر كلام كتير اوي كنت بقولوه انا وصحابي
ازاي ان كل الستات اللي نعرفهم مش مبسطوين
مع كل الاختيارات المختلفة جدا عن بعضها اللي خدوها .. في الاخر النتيجة واحدة
اللي اتجوزت بدري واطلقت بدري . وبعدين قررت تعيش الحياة زي ماهي عايزها ... مش مبسوطة
واللي اتجوزت واستحملت لفترة طويلة حياة تعيسة، اطلقت وعاشت تربي عيالها.. مش مبسوطة
واللي متطلقتش وعاشت طول حياتها مش مبسوطة عشان تحاول تحافظ علي الشكل الاجتماعي للأسرة.. مش مبسوطة
واللي متجوزتش خالص.. وعرفت تبني حياة مستقلة جدا.. مش مبسوطة.. وبتقلي اهم يوم في حياة البنت هو يوم فرحها
بجد مش فاهمة!!!
اللي يعرف النماذج دي من قريب حيهم قصدي كويس.. وحيفهم ان مش مبسوطة دي كلمة سطحية عشان مدخلش في خصوصيات بني ادمين
بس هما من وجهة نظري مش بس مش مبسوطين.. لأ أصلا مش عايشين.. مش عارفين يعيشوا
عشان كده كل الاختيارات غلط
الستات القوية والضعيفة، اللي عرفت تخرج بره السور واللي خافت وفضلت السلامة واللي خدت اختيارات في النص.. اللي عاشت لنفسها واللي خلقت حاجة براها تعيش عشانها.. كلهم انكسروا .. وكلهم اتوجعوا
كلهم مش عارفين يعيشوا
..............
ملحوظة: هذه ليست دعوة للتشاؤم ، ولا هي محاولة لتنظيرة نسوية، انها ليست أكثر من بعض الملاحظات علي شخصيات اعرفها جيدا تعيش الان. واري فيها بعض التوقعات لي انا وصديقاتي بعد عشرون او ثلاثون عام