Thursday, July 27, 2006

لا احتلال ولا طائفية ...يا لبنان وحده وطنية

لا احتلال ولا طائفية ...يا لبنان وحده وطنية

ذهبت لمظاهرة الاربعاء محمل بالكثير والكثير من التناقضات ولاول امرة اشعر انى لا اريد المشاركة ولا اريد ان ارى مايزيد من احساسى بالاغتراب عن الحالة السياسية فى مصر ولكننى لاول مرة اكون بهذا الاصرار لضرورة النزول للشارع والمشاركة من اجل الدفاع عن افكارى واحلامى لهذا المجتمع حتى وان اختلفت مع الكثيرين وحتى اثبت ايضا انه ليس لاحد الحق فى احتكار الدعوة او المشاركة بشعاراته حتى لو كنت وحدى سانزل

دخلت المضاهرة وبدات اخرج لافتاتى التى صنعتها والتى تحمل شعارات ضد الحرب وااتى طبعت منها من مدونة احمد ( احد ) وجدت الاصدقاء القدامى والوجوه
المعروفة ولكننى بدات اشعر بالصدمة مما يحدث فاعلام حزب الله اكثر من اعلام لبنان والهتاف باسم حزب الله اكثر من الهتاف للبنان سمعت احد الفنانات المعروفة بانتمائتها اليسارية تستغرب جدا لماذا لا يوجد صورة لحسن نصرالله كبيرة بدلا من الصور الصغيرة وبدأت تلوم المتواجدين حولها حتى وصلت الى وكنت بدات ادخل فى حالة من الذهول وهنا عملت عبيط وقررت التحرك الى اى بقعة اخرى فى المظاهرة حتى وجدت بعض الاصدقاء ينادونى وهم فى نفس الحالة من الذهول وبعضهم فى حالة من الغضب وبدانا الحديث عما يحدث وحاولنا عدم الانتباه لندائات المتظاهرين على حسن نصرالله الذى توقعت ان يخرج لهم من شرفة عمارة زورو لبنان ليرد تحيتهم وكانت الصاعقة عندما اعلنت منصة المظاهرة عن مقتل المئات من قوات المظلات الاسرائيلية على يد حزب الله وهنا تعالت الهتافات والسلامات تذكرت معها مظاهرة الميدان ضد حرب العراق فكانو هم نفس نجوم المنصة ونفس من اعلنو ان القوات العراقية تسقط الطائرات الامريكية والدبابات وان امريكا تهزم شر هزيمة وتذكرت معها ما كتبه عمر عزت فى مدونته مابدالى على صوت العرب فى 67 وهنا كان علينا التكلم وبدانا فى الهتاف بشعار اساسى لا احتال ولا طائفية .. يا لبنان وحدة وطنية هتاف عبر عنا رغم صدوره بشكل عفوى بعد محاولات متعددة وانضم لنا البعض ولكن بدات اصوات المتظاهرين الباقيين تعلو على اصواتنا بهتاف واحد كاتيوشا كاتيوشا وهنا توقفت بعد سؤال صديقة لى هو احنا هنهتف كمان لنوع السلاح . انا لن ازايد بانسانيتى ولكننا نهتف ونهلل لنوع صاروخ ما هذا العبث فى النهاية وبعدد مرور اكثر من ساعتين وبعد تضييق الامن على المظاهرة ومحاولاتنا جميعا لصده شعرت اننا يجب علينا الرحيل ولكننى ظللت اشاهد مسلسل كل مظاهرة وهو اصرار البعض ان ينضرب وانها نوع من الدفاع عن الوطن ان ننضرب ونلتحم وبالتأكيد نحن الخاسرون فى المعركة ماذا ننتظر لانهاء المظاهرة وهل نتخيل اننا سنقف حتى تخرج اسرائيل من لبنان ثم فلسطين ثم تمحى الدولة المزعومة من على الخريطة ثم تقوم ثورة بتحالف اليسار مع الاخوان بامريكا تحت شعارات قومية ويسيطرون على الحكم وبالمره يعاد بناء حائط برلين متى تكون لنا حسابات منطقية .

موقف ختامى حدث : صديقة لى تسير بعلم احمر مكتوب عليه اوقفو العدوان فتراها صديقة ايضا من اليسارجية فتقول لها ايه اللى انتى شايلاه ده هو انتى كمان . ملحوظة الصديقة اليسارجية التى قالت هذه الجمل كانت تتلفح بعلم حزب الله يلا ما هى كلها ثورية وما يهمش اذا كانت مهلبية و لا فاشية ولا طائفية

صورة محزنة : طفل صغير فى المظاهرة يلبس ملابس جيش ويرفع بندقية بلاستيك . على ماذا نربى اطفالنا , شعوب العالم ترمى السلاح ونحن نعلمه لاطفالنا





بسام مرتضى

Saturday, July 22, 2006

مبروك ياخلود

مبروك ياخلود
اللى باكتبه انهاردة حاجة فرحتنى فرحة من اكتر أفراح حياتى، نجاح خلود وطلوعها الأولى بممتاز.....من اجمل الأخبار لأننا كنا مستنينها بفارغ الصبر ولأنها جات فى أيام زى الطين علينا كلنا واملنا انها تكسر النحس بتاع الأيام دى وطبعا علشان انا غير متصورة اللى كان هيحصل لنا كلنا لو ده محصلش علشان خاطر خلود ومنها علشان الحق يعنى
مبروك يادودى وعقبال ..........................كل حاجه
مزن

Wednesday, July 19, 2006

انا و مترو الانفاق


حكايتي مع مترو الانفاق حكاية طويلة
من ساعة ما دخلت الجامعة في 2000 و لغاية دلوقتي و المترو مواصلتي الاساسية ، المفروض انه اكتر مواصلة عملية ، شبكته بتغطي مناطق كتير من العاصمة ، مواعيده مضبوطة ، ما بيتاثرش بزحمة الشوارع ، في عربية سيدات ترحم البنات و لو لفترة بسيطة من سخافات كتيرة ، و الاهم ان سعر تذكرته بسيط، اسعار التذاكر كانت بتتراوح من 50 قرش لغاية 75 قرش و كانت بتختلف باختلاف المسافة ، و بعدين اتوحدت تذكرة المترو و بقت ب 75 قرش بعد حادثة قطار الصعيد ، بعد اضافة تأمين علي المواصلات ، و لكن الزيادة دي ما عالجتش اي مشكلة من مشاكل المترو ، المترو لسة بيتأخر و كتير اوي بيوقف بين المحطات عشان صيانة القضبان و لسة نظام التهوية سيئ جدااااااااا ، دة طبعا غير الزحمة البشعة اللي بقت السمة الاساسية للمترو، ، دة غير غياب الميزة اللي كانت دايما بتميز المترو عن اي مكان تاني في مصر ، و هي التطبيق الفوري للقانون و احترامه ، دلوقتي من العادي جدا ان اي حد يرمي ورق في المترو و محطاته و كمان عادي قوي ان اي حد يزوغ و ما يدفعش تذكرة
و اخيرا زادت التذكرة و بقت بجنيه ، و برضه الوضع لسة سيئ و المستفز ان المترو بقي له موارد اخري غير التذاكر زي الاعلانات اللي بتلصق علي المترو كله و كمان الاعلانات اللي بتشتغل في اذاعة المترو و الاعلانات الموجودة في المحطات ، كل دة و يقولوا ان هئية المترو بتخسر 60 مليون جنيه في السنة ، طب ازاي؟
كمان ازعجني اوي توقيت زيادة اسعار التذاكر ، لانه جاء بعد رفض البرلمان لقانون خصخصة السكة الحديد، يعني من الاخر وزارة النقل كانت عاوزة فلوس و سلام تزود التذاكر علي الناس ، تبيع السكة الحديد ، المهم تجيب فلوس و السلام مش فارق الفلوس دي من اللي دافعها المستثمرين اللي ها يكسبوا و يرجعوا اللي دفعوه الطاق طاقين و لا من الطلبة و الموظفين
انا ما عنديش مشكلة ان هيئة المترو تكسب ، بس في المقابل يبقي في خدمة جيدة ، مش لازم المترو يبقي مكان للعذاب و المعاناة اليومية
فاطمة

Saturday, July 15, 2006

غزة ... بيروت


غزة ...بيروت
وانا بتابع اللى بيحصل فى غزة و لبنان حسيت ان قلبى اتئبض وملئتش كلام يعبر عن اللى حاسه غير قصيدة محمود درويش

جندى يحلم بالذنابق البيضاء


سألته: حزنت؟
أجابني مقاطعا يا صاحبي محمود
الحزن طيّر أبيض
لا يقرب الميدان. و الجنود
يرتكبون الإثم حين يحزنزن
كنت هناك آلة تنفث نارا وردى
و تجعل الفضاء طيرا أسودا
حدثّني عن حبه الأول،
فيما بعد
عن شوارع بعيدة،
و عن ردود الفعل بعد الحرب
عن بطولة المذياع و الجريدة
و عندما خبأ في منديله سعلته
سألته: أنلتقي
أجاب: في مدينة بعيدة
حين ملأت كأسه الرابع
قلت مازحا.. ترحل و.. الوطن ؟
أجاب: دعني..
إنني أحلم بالزنابق البيضاء
بشارع مغرّد و منزل مضاء
أريد قلبا طيبا، لا حشو بندقية
أريد يوما مشمسا، لا لحظة انتصار
مجنونة.. فاشيّة
أريد طفلا باسما يضحك للنهار،
لا قطعة في الآله الحربية
جئت لأحيا مطلع الشموس
لا مغربها
ودعني، لأنه.. يبحث عن زنابق بيضاء
عن طائر يستقبل الصباح
فوق غصن زيتون
لأنه لا يفهم الأشياء
إلاّ كما يحسّها.. يشمّها
يفهم_ قال لي_ إن الوطن
أن أحتسي قهوة أمي..
أن أعود، آمنا مع، المساء


من قصيدة جندى يحلم بالذنابق البيضاء لمحمود درويش

بسام

Thursday, July 13, 2006

سيناء و الشيكولاتة



انا اتقهرت و اتنقطت و انا باقرأ المصري اليوم النهاردة (13/7/2006) في الصفحة الاخيرة خبر عن تقرير النيابة الادارية عن محافظ جنوب سيناء السابق ، سيادة المحافظ استهلك 196 الف جنيه في شراء الشيكولاتة ، في مدة سنة نصف و الفلوس دي من صندوق تنشيط السياحة ، يعني بمعدل صرف 330 جنيه لشراء شيكولاتة يوميا
طبعا انا عارفة ان خزينة المحافظة متخمة من كثر الفلوس و انا المحافظ بعد ما
نفذ كل مشروعات التنمية في سيناء و حدث كل وسائل الترفيه و الراحة في مقرات الامن في سيناء و تطور المجتمع السيناوي ، الرجل ما عرفش يودي الفلوس فين ، قال يبقي مضايف مع الضيوف الي زاروا المحافظة ، و اهو علي رأي المثل اطعم الفم تستحي العين ، عشان ما يطلعش باحث زي د/ محمد السيد سعيد و يقول قال ايه ان الحكومة الوحشة تتحمل مسئولية تهميش الانسان السيناوي و تخلف المجتمع السيناوي اللي ادي لظهور خلايا ارهابية في سيناء و ان الاستراتيجية الامنية اللي بتستخدمها الحكومة مع سيناء و اعتبارها لسيناء منطقة حدود مع اسرائيل و مكان لحفر الانفاق لغزة و بس!!!!!!!
كأنها ارض بلا سكان ، الاعتبار الاول و الاخير للامن ، اما الانسان المصري سواء في سيناء او غيرها فهو في ذيل القائمة
لكي الله يا مصر
المرصد الاعلامي .

Wednesday, July 12, 2006

مناضل ديموقراطى فاشى

مناضل ديموقراطى فاشى

فى الفترة الاخيرة ظهرت عدة تداعيات مهمة جدا على الساحة السياسية اعتبرها الكثير مش مهمة لكنها عملتلى حالة عالية من الازعاج فاق تصرفات الدولة البوليسية اهم حادثة واقربها كانت عضو كتلة الاخوان -على لبن -لما طالب بجلد الصحفى ال ايه اللى بيرمى المحصنات ده بالنسبه لى مكنش حادث عجيب ولا ملفت لانه حالة طبيعية من اداء كتلة الاخوان المسلمين فى البرلمان وفى الحياه كلها أما الغريب بقى والملفت والمستفز انه يظهر مجمايع من المفترض انها من قوى تقدمية تدافع عنه وعن غيره تحت منطق شرفاء الوطن والمعركة الوطنية والوطنيين امام الفساد فجأة نبتدى ندافع عن عضو هو من الاساس معندوش اى احترام للقانون بس كفاية انو يكون معارض . العضو المحترم اللى مش محترم القانون ولا يرى له اى فائدة ميفرئش عندى عن ناس كتير كمان بتطالب بجلد مبارك ورجم جمال وخزوئة صفوت ويوسع منهم الموضوع ليوصل للمطالبة بحرق سفارة وقتل سفير – مهما كانت السفارة والسفير- وبعدين نشجع ونهللل لبرنامج نووى لدولة على ان ده هو اللى هيكسر القتلة .


ازاى احنا بنطالب بدولة قانون واحنا بالمطالب الفاشية دى . انا بجد حزين والدنيا من حوليا عمال تزيد سخافة


بسام

Tuesday, July 11, 2006

يا تري بكرة الدور علي مين؟؟؟؟؟


اصدر مجلس الشعب قانون عقوبات النشر ، بعد الكثير من الجدل اللي اثاره القانون دة و رفض جموع الصحفيين له ، لانه يفرض قيود جديدة- دة غير الموجودة اصلا- علي حرية الصحافة
ازمة اصدار هذا القانون اثارت في عقلي كذا تساؤل ، لعل اهمها لغاية امتي ها يبقي الرئيس هو الفاعل الاساسي و الاقوي في النظام السياسي ، و لغاية امتي ها نفضل نقول عبارة " بناء علي توجيهات السيد الرئيس " ، انا عارفة ان الدستور بيسمح للرئيس بسلطات تشريعية ، بس مش ممكن كل حاجة تبدأ و تنتهي عند الرئيس ، مش ممكن يختزل النظام السياسي كله في شخص رئيس الجمهورية
الحاجة الثانية اللي فكرت فيها هي اداء نواب الحزب الوطني في مناقشة هذا القانون ، في الاول كل نواب الحزب الوطني كانوا رافضين اجراء تعديلات خاصة فيما يتعلق بمادة الذمة المالية و مادة اهانة رئيس دولة اجنبية ، و لكن الموقف دة اتغير تماما بعد " تعليمات الرئيس " بتعديل هذه المواد و بدأوا في وصلة شكر منقطعة النظير للرئيس ، ليه حتي ما قسموش نفسهم مجموعتين ، مجموعة مرنة قابلة للتفاوض و مجموعة تانية متشددة و ترفض التفاوض، حتي عشان تبان اللعبة مسبوكة واهو يبقي دليل علي الفكر الجديد ، ليه كلهم كانوا زي القطيع في الحالتين اوعي حد يقول لي الانتماء الحزبي ، الحزب الوطني شهد في العديد من الانتخابات انشقاقات متكررة بين صفوف اعضائه
الحاجة الثالثة : هي الصحف القومية علي الرغم من ان العديد من الصحفيين فيها اعترضوا علي القانون دة الا ان اللي حركهم هو علاقتهم بالحكومة و لم ينضموا للصحف المستقلة و الحزبية في احتجابهم عن الظهور يوم الاحد 9 يوليو ، كما لو القانون دة مش ها يضرهم او يطبق عليهم
يلا اهي حلقة في السلسلة امبارح القضاة و النهاردة الصحفيين ..... يا تري بكرة الدور علي مين ؟؟؟؟؟؟؟؟
المرصد الاعلامي

Sunday, July 09, 2006

مبروك أيطاليا ..باى باى يا مونديال

بصفتى ايطالى فظيع ومتعصب من ايام الكابتن روسى اللى وعيت عليه طشاش مرورا بباجيو وميضرش معاهم اسكلتشى وكسيراجى نهاية بجيل المودل الجامد اخيرا فرقتى منذ نعومة اظافرى فرحتنى بكاس عالم وانا واعى كده ومعاكم حبيت انقلكم اهم افيهات المونديال من على قهوتى بعد المولد ما خلص


حركة شفشينكو وبرنامجها اللعب على الهجمة المرتدة

هنرى : خلى هيفا تنفعك

الفرنسيس فكرنها المنصورة - واحد صحبى ذكورى اوى

اتوفيستر مدرب توجو : خليه ينزل عبد الحليم

واه يا سعودى - دى افيه لوحده

اسماء لاعبى كوت ديفوار - تيزى - ذكورة - لا حول ولا قوة الا بالله

شاكيرا فى حفلة النهائى ...........الرقابة اصت كتير اوى

كلوزه ده معجون سنان - شنفشتيجر والنبى فى عيل اهله يسموه كده

متعرفش مش منتخب فرنسا نصو مسلمين الله اكبر الله اكبر اللعب يا ابن الكل.....؟

زيزو زيزو حد يضرب الواد ده عوره اقتله لا .زيزو جاب جون

بسام

اسكندرية تانى

مرت بيا ايام وانا خارج تفاصيلى اليومية فانا فى الاسكندرية اللى فيها اهلى وزكرياتى الجامعية اللى أغلبها مؤلمة وحزينة، صاحبتى اللى ماتت، اصحابى اللى خسرتهم، وصحباتى اللى سافروا ومعرفش عنهم حاجة رغم اننا كنا مبنسيبش بعض ولا ثانية........ولاء الوحيدة اللى صاحبتى ولسه عارفة كل حاجة عنى وكل ما اجى اسكندرية اكتشف انى اتغيرت جدا، ساعات مبعرفش نفسى، انا ازاى اتغيرت كده؟! يمكن علشان مكنتش سعيدة ولاراضية عن نفسى زمان ودايما حاسة انى ناقصنى حاجة
هو انا سعيدة دلوقت؟!لا، بس حاسة انى مش وحيدة حواليا مجموعة من الأصحاب لاقية نفسى معاهم، من غبر مايحكوموا عليا ولا يحاسبونى بس قادرين يساعدونى ويقفوا جنبى
كل ده مخلينى واثقة اننا هنقدر نعدى كل حاجه علشان احنا مع بعض
مزن

Wednesday, July 05, 2006

دستور يا اسيادنا


النهاردة زي كل يوم ابتديت شغلي بقراءة الجرائد ، بدأت بالمصري اليوم بصفحة " قضايا ساخنة "كل الاهتمام منصب علي تعديلات قانون جرائم النشر و ازاي ان القانون المقترح اسوأ من اللي قبله وان فرض قيود اضافية علي الصحفيين ، بس اكتأبت كالعادة و سبت الصفحة و قلت اما اشوف تغطية الاحداث العربية ، اذ بي افوجئ ان الرئيس الجزائري عبد العزيز بوتفليقة اصدر عفو عن الصحفيين المتهمين في قضايا سب المسئولين و مؤسسات الدولة ، و الله شئ جميل و يا ما احلي الحرية و عمار يا جزائر .
سبت المصري اليوم و قلت ابص علي الانترنت اشوف الدنيا فيها ايه ، اول خبرفي اسلام اون لاين " تعديل الدستور للتمديد لبو تفليقة " لا حول و لا قوة الا بالله ، ما كنا كويسين من سطرين بس ، يلا بس دة مش جديد علينا ما قبله السادات عملها و شال اي تحديد لفترة تولي الرئاسة في مصر و بعده زين العابدين بن علي في تونس و في سوريا عدلوا الدستور عشان خاطر عيون بشار الاسد و اميل لحود عدل الدستور عشان يستمر اكتر في السلطة ، واضح ان في مشكلة عميقة مع الدساتير العربية ، و لكن الحمد لله الوضع مش سيئ اوي كدة ،تأتي موريتانيا كبارقة امل في وسط الضلمة العربية ، علي ولد فال رئيس موريتانيا الحالي اللي وصل للحكم عن طريق انقلاب عسكري اطاح فيه بمعاوية ولد طايع الرئيس الموريتاني الاسبق ، اقترح تعديلات دستورية هائلة ، اولا مفيش حد من المجلس العسكري الي بيحكم موريتانيا دلوقت بيترشح للانتخابات القادمة و حدد مدة تولي الرئاسة بمرتين فقط كل مدة خمسة سنوات و دة غير عدم جواز ترشح من تجاوز 65 سنة في الانتخابات الرئاسية و اهم تعديل هو ان المواد المعدلة من الدستور السابق الاشارة لها لا يمكن تعديلها و او االغائها من اي رئيس قادم و دي ضمانة لعدم المساس بالمتكسبات دي و عرضت هذه التعديلات علي الشعب الموريتاني يوم 25/6 اللي فات و وافق علي التعديلات بنسبة كبيرة ، بس مش النسبة العربية المتعادة 99.9 في المية .
علي ولد فال التزم انه يحكم لفترة قصيرة حتي استقرار الاوضاع و بعدها تجري انتخابات تحدد رئيس الدولة و باقي المؤسسات المنتخبة ، يعني وعد و التزم علي الله ما تصيبوش لعنة باقي الحكام العرب يوعد و يرجع في كلامه زي بعضهم
ملحوظة: الصورة يسار الصفحة لعلي ولد فال
امضاء
المرصد الاعلامي

Sunday, July 02, 2006

اوقات فراغ


الدائرة مش مجرد شكل هندسي ، دي حالة خط غير منتهي، ما تحسش ان انت اتقدمت و لا اتأخرت ، دايما ترجع تاني للمكان اللي ابتديت منه .هو ده اللي حسيت به و انا باسمع اغنية " دواير " اللي كتبها عبد الرحمن الابنودي و غناها مروان خوري، الاغنية حلوة اوي و مؤثرة لفيلم مؤثر فيلم اوقات فراغ ، فيلم الفه شباب بيحكي عن الشباب مش تجاري مبتذل ، بيقدم بني ادمين من دم و لحم ، بني ادمين فيهم الحلو و الوحش ولا هما جناة علي طول الخط ولا هما ضحايا علي طول الخط.قبل ما اشوف الفيلم قرأت مقالات عنه و كمان مزن كلمتني عليه ،و قالت لي ممكن تتضايقي ، المهم دخلت الفيلم انطباعاتي كانت سلبية اوي في الاول ، ما قدروش يخلوني اتعاطف معاهم الا لما مات صاحبهم طارق، علي الرغم من ان مشهد موت طارق كان مفتعل اوي خصوصا الجملة اللي قالها احمد حداد و هو بيموت .
الفيلم استفزني فعلا ، علاقتهم بربنا و ازاي بيتكلموا عنه و هما بيحششوا، انا عارفة ان مفيش حاجب نستأذن منه قبل ما نتكلم مع ربنا ،بس ما كنتش مستوعبة ازاي تبقي كل علاقاتنا بربنا محصورة في طرحة علي شعر بنت او شعائر بنأديها بانتظام زي الالة ، و لاكمان فهمت فكرة ان الدين مش اكتر من كهف ندخلوه و احنا مجروحين نطيب جروحنا و نخرج تاني نستأنف حياتنا و كأن شئ لم يكن ، نفس فكرة اللي كانت في الافلام القديمة بعد ما البطل يتصدم يجري علي اول بار و يشرب عشان ينسي
و بعدين فكرة السلبية كل بطل من ابطال الفيلم عنده مبرر للفساد دة اهله منفصلين و دة اهله اهملوه و دة ابوه مش قادر يتفاهم معاه ، كأنهم ما اختاروش اللي هما فيه او مش مستمتعين به ، كأنهم ما قادرين يغيروا اللي هما فيه دة طبعا مستفز ،اه حاولوا لكن دايما كانوا بيرموا سبب الفشل علي حد تاني اه كلنا بندخل كتير في دوامات بس كمان لو حبنا نخرج بنحاول مش لازم ننجح بس علي الاقل نحاول و لما نفشل ما نعلقش فشلنا علي شماعات ناس تانية . .
دة كله كوم طبعا و غير حرقة الدم اللي حصلت لي من موقف حازم مع منة البنت اللي ممكن يغلط معاها و يحاسبها علي لبسها و تصرفاتها و الاسخف من دة كله احساس التملك اللي انهي به علاقته بها ازاي يروح يشوفها و هي بتتجوز واحد تاني ، كأنها لازم تفضل راهبة في محراب سيادته
اللي قلته مش معناه ان الفيلم ما عجبنيش او ما مسش حاجة في نفسي ، بالعكس ان شايفة ان الفيلم تجربة متميزة ، علي الاقل بتسيب في نفسك اثر ، مش بتمر مرور الكرام زي حاجات تانية كتير .
فاطمة
.

فضفضة

فضفضة
أعدت كتير محتارة اكتب ايه في أول موضوع على البلوج ... و بعدين قررت بما أن مزن بدأت بالمرأة وبسام بدأ بالسينما فواجب عليا أنا كمان ابدأ بحبة تنظير في علم النفس ، يعني هو مش علم نفس أوي بس ما علينا.
دايما كنت بحس اني في حاجة غلط ، انا وكل اللى حواليا حياتنا بالورقة والقلم ممكن تبان لطيفة جدا، عارفين نعمل صداقات، وننجح في شغلنا او دراستنا، وكتير الناس بتسقف لينا وتقول ياه أزاي شاطرين كده، واما كان حد بيقول انه مكتئب اللى حواليه دايما كانوا مستغربين، وكان دايما سؤال ليه؟؟؟ هو ايه اللي حصل ؟؟؟ وعادة ما فيش اجابة واضحة او فيه اجابة عبيطة متقنعش حد، بس الفكرة ان هو نفسه كتير بيكون مش عارف هو مكتئب ليه وايه اللي حصل؟؟؟ وساعتها الحل حاجة من الاثنين اما يقنع نفسه انه مكتئب على اي حاجة عبيطة، او انه يقنع نفسه ان كله تمام والدنيا لطيفة، بس بعد الشوية الحوار كله بيقع ويرجع يحس انها مش كده، طيب فين المشكلة.
المشكلة ان احنا مش عارفين نشوف ان فيه مشكلة، او خايفين نشوف،
يمكن تكون في الدنيا اللى ماشية بسرعة، اللى مش مديانا فرصة نستوعب اللي بيحصل، او يمكن تكون في اننا متعودناش نفكر في اي حاجة ليها علاقة بينا ( واكيد مش قصدي الشغل ولا العيلة ولا الدراسة ) لأ . ليها علاقة بينا من جوة، حاسيين بايه وشايفين الدنيا أزاي، ساعات بنكسل نعمل ده وكتير بنخاف، يمكن بنخاف علشان لو عاملناه حنشوف حاجات مش عايزين نشوفها، ومفروض يترتب عليها قرارات مش قادرين نأخدها، فيكون الحل ان احنا نعلن أن يبقي الوضع على ماهو عليه، ونسيب الدولاب مقفول زي ماهو. يعني ميكانزم دفاعي بسيط كلنا بنعمله، وبنحاول نبان أقوية واد ايه احنا متعاملين في الدنيا، ونسقط همومنا ومخاوفنا على اللى حولينا و على الدنيا العبثية والروتين والأختيارات الغلط اللى الناس بتأخدها، والناس العبيطة الغبية اللى مش فاهمة...ألخ علشان في الاخر نسبة صحة نظريتا ان كله تمام فينا والعيب برانا .. بس ده مش حقيقي.. فأن أحدث الدراسات النفسية أثبتت أن كل واحد شايف الدنيا حوليه فيها مشكلة بيكون العيب فيه مش في الدنيا أو على الأقل في الطريقة اللى بيتعامل فيها مع الدنيا.... وانا بدعي ان كلنا عدنا المشكلة دي بشكل أو باخر بس المهم نبطل نلقي اتهامات وننظر في مشاكل الاخرين.
ملحوظة: علشان محدش يفهمني غلط دى ماكنتش محاولة اني اكئبكوا ولا اني اقنعكوا ان كلوا مكتئبين، ولا هي محاولة تنظير والله ... الموضوع كله مجرد فضفضة
خلود