Wednesday, January 16, 2008

حركة نسوية مترو انفاقية ِ


سيداتي انساتي ساداتي ازف اليكم بشري تكوين اول اتحاد نسوي في مترو الانفاق

متخيلة طبعا ردود الافعال ، استنوا هافهمكم من اول طق طق لحد سلامه عليكم
مترو الانفاق و خصوصا عربية الستات ممكن تشوفوا فيها شريحة عريضة من المجتمع المصري ممكن تشوفوا في مترو الانفاق، هوس الاستهلاكية و احدث انواع الموبايلات و الرنات علي الرغم من ان ركاب مترو الانفاق اغلبهم من ابناء الطبقة المتوسطة بتنوعاتها المختلفة يعني المفروض في ظل الرخاء اللي احنا فيه يصرفوا فلوسهم المرطرطة علي اساسيات زي الموبايل طبعا
و كمان ممكن تشوفوا محاكم التفتيش و الزغر و التنبيط اللي بتحصل للي مش يقولوا دعاء الركوب و بيشقوا عصا الجماعة و لا للي مش محجبات، دة غير الاستيكرات اللي اختزلت ايمان النساء في عدم نتف الحواجب او استخدام العطور ، و كمان ممكن تشوفوا مظاهر لانهيار قيم التكافل و التراحم في مجتمعنا و خاصة لما تشوفوا الامهات اللي شايلين عيالهم و لا الحوامل و لا الستات الكبار و هما واقفين و بقية القاعدين شابات في ريعان الشباب و عنفوان الصبا ، و هنا بقي الكل بينسي ان الدين المعاملة و الحديث اللي يقول افعل كما شئت كما تدين تدان
دي المظاهر العادية اللي فضلت اشوفها في المترو فترة كبيرة اوي من ايام ما كنت في الكلية و لغاية دلوقتي، الجديد بقي هي الحوارات اللي اتولدت مع تغيير موقع عربية الستات من العربية الاولي و التانية المجاورة لعربية السواق، للعربية الرابعة و الخامسة انا ما فهمتش عملوا كدة ليه و قلت عادي بقي، بس الحوارات اللي في المترو عكست لي حاجات كتيرة اوي
في البداية اوضحت لي ان التغييرات دي بسبب الحادثة اللي حصلت للمترو قبل العيد الاضحي اللي فات في اخر محطات اتجاه حلوان، و تعددت التفسيرات و التفسير اللي تبنته الستات اللي في المترو قال ايه ان الستات الوحشين المزعجين خبطوا علي السواق و ازعجوه فالرجل دخل في الحيطة ، و نسيوا ان عربيات الستات من سنة تسعو و تمانين في قفا السواق و عمر دة ما عمل اي مشكلة ، المشكلة كانت زي ما الجرايد قالت ان السواق كان لوحده من غير مساعد و بيرغي مع السواقين التانيين و مش مركز في السكة ، للامانة مش عارفة اذا كانت التحقيقات ايدت صحة الفرض دة و لا لا
المهم العربية اتنقلت يا اما لان اغلب الاصابات في الحادثة كانت في عربية الستات او لابعاد السواق عن فتنة الستات الوحشين ،
و عليه اتنقلت العربية الي العربية الرابعة و الخامسة، هيئة المترو دهنت الارض و كتبت سيدات و كمان لزقوا استيكرات بتقول ان العربيات دي للسيدات بس بتقول لمين بقي ، الرجالة طبعا احتلوا المكان الوحيد اللي فيه تمييز ايجابي للستات في مصر ، و الخناقات في العربية بقي للركب ، ياما الستات اللي قرفانة من الجليطة و الاستهبال بتاع الرجالة اللي مش محترمين نفسهم و لا القانون و كمان الرجالة اللي بيقولوا انهم ها يطردوا الستات من عربية الرجالة، اللي هي مش موجودة اصلا عربيات المترو يا مختلطة يا سيدات ،و كان في فئة تانية بقي من الستات مستفزة جدا و هي الستات اللي لابدة في ضل رجالتها حتي في المترو ، و شايفين انهم محارم لازواجهم في عربية الستات.
و من هنا بدأ الزحف المقدس، الخناقات بقي كشفت عن اساليب النساء المصريات في النضال من اجل حقوقهن اللي تعددت بين النقاش الهادئ للسب في سلسفين جدود اللي مضايقينهم الي الشباشب في مراحل متطورة، طبعا انا كنت حاسة ان ارواح الرائدات بترفرف علي العربية و اتحدت بعض الستات اخيرا من اجل النضال من اجل عربية للستات و بس و تعالت الاصوات و تناثرت القذائف الكلامية و الفعلية ، خناقة جامدة
و دة ملخص لمشاهداتي في مترو الانفاق في الكم يوم اللي فاتوا ، بجد العربية اثبتت لي ان الستات ساعات مش بس لا مباليات بضياع حقوقهن ساعات هما مصدر التمييز و ساعات هما الطوق الاخير للنجاة

فلتحيا عربية الستات حرة مستقلة
فاطمة

Labels:

Thursday, January 10, 2008

خالد يوسف .... كلاكيت تاني مرة



وعدنا مرة اخري ..
شفت الفيلم من اربع خمس ايام والمرة دي قررت اني مكتبش في نفس اليوم عشان كان جوايا كم غضب غير طبيعي مكنش عايزة الموضوع يتحول لشتيمة او تريقة وخلاص
بجد المرة دي عايزة حد يفهمني ،يمكن ييكون الموضوع كله ان انا وصحابي حبة مجانين خارج التاريخ .... يمكن
حين ميسرة فعلا فاق كل توقعاتي .. بالرغم من اني كنت ممهدة نفسينا جدا اني داخلة اشوف تهريج، بس المشكلة فعلا اني كنت طول الفيلم مبهورة بكم العك والقرف
ليه ؟؟؟ عشان حاجات كتير اوي:
· وابسطهم علي الاطلاق ، التكنيك المضحك اللي متصور بيه الفيلم، واللي رغم اني لا ادعي انني افهم في تكنيكات السنيما كان صادم بالنسبة ليا، مشاهد التركيب العظيمة ( خاصا مشهد القطر) ، السيناريو الغريب ، التمثيل المفتعل في احيان كتير ، كنت حاسة اني بتفرج علي حبة سكتشيات سيئة الصن متلزقة ورا بعضها .
- وبيجي تحت كده فكرة الزمن ، اللي بجد عندوا حاجة في دماغوا ، معندوش اي ادراك ليها، يعني نلاقي حد فات عليه ثمن سنين ، والمشهد اللي بعده الراجل لسه بيطلع السلم.
· مشاهد مش عارفة افهم معناها لحد دلوقتي :
1- مدام غادة عبد الرازق اللي لحد النهاردة مش فاهمة ايه كانت علاقتها بالموضوع ( مع العلم باني لم يكن عندي اي مشكلة اخلاقية معها ) غير ان المبدع خالد يوسف كعادته لازم يفتح عين الشعب المصري المغيب علي جميع مشكلات المجتمع المصري المعاصر ، وبيقولنا ياجماعة علي فكرة في ستات كده في الدنيا .. اوكيه مرسيه علي المعلومة ، وممكن كمان يكون بيقولنا ان سمية الخشاب مزة فظيعة ، يعني ده حتي الستات طمعانين فيها، بس والنبي حد يقولوا ان محدش بيدخل ينام بالفوطة حتي لو كان مزة زي سمية الخشاب .
2- مشاهد الارهابين الكتيييييييير ، دي بئة كانت مسخرة، وقديمة اوي ، وبرضة بيقول فيها لشعب مصر خلي بلكو الارهابين في كل مكان ، وبعدين دول بيستخدموا الكوبيوتر وعنده لاب توب، - واللي بيفكرنا بمشهد الارهابين في فيلم الاخر اللي تقريبا شبه بالنص، بس برضه خد يقولوا كان يكلف نفسه خمس دقايق ويروي احمد بدير الناس بتستخدم الكمبيوتر ازاي ، لحسن كان مضحك جدا.
3- المشهد المقرف بتاع اغتضاب المزة سمية الخشاب ( واللي برضه مكنشي عندي مشكلة اخلاقية معاها) غير انه متصور وحش اوي وطويل وزعج بصريا وصوتيا، وبعدين انتهي بمفجأة قتلتني، ( وسقطت بغداد ) ، خالص مزة لفيام اغتصبت ياجماعة واللي حيقلي ان الامريكان هما السبب في اغتصاب سمية الخشاب وامريكا بتقتل كل حنين وكده حرمي نفسي من البلكونة .
4- وطبعا مشاهد التعذيب ................ بجد لا تعليق

· تيجي الكارثة الكبري بئة واللي بجد هي اكتر سبب للغضب بالنسبة ليا، لو تخيلنا ان كل اللي فات ده لي علاقة بمهارات اخراجية غير متوفرة عند الباشا خالد، حيفضل في كارثة تانية ، هي الصورة اللي مصور بيها ( المواطنين العشوائين ) – علي حد تعبير دم الغزال – واطفال الشوراع ، بجد ايه كم القرف والابتذال والتعالي ده

.
لا مش هما كده ولا مش هو ده الواقع، ده مش اكتر من تصور راجل راكب عربيته، ولقي ياحرام عيال عدموها مقطعة ، وقرر يعمل عنهم فيلم،
المشكلة انوا حسسنني ان تناول مثل هذه القضايا في السينما المصرية شيء جديد تماما علينا، وكأننا متعمش قبل كده.. الكيتكات، ومواطن ومخبر وحرامي، وغيرهم، ومع الفراق طبعا ( وان مش كلهم ناس ياحرام فقرا) بس فس الاخر حد كان بيخدك في الدنيا ، وحد كان بيصور بكميرا من فوق، وبعدين يخليك تقول ياحرام ناس عايشين كده.
انا بجد زهقت:
زهقت من سلسة الافلام التعليمية الثورية بتاعت خالد يوسف
زهقت من الطريقة اللي الطبقة الوسطي المصرية بتشوف بيها الدنيا ، حبة اغنيا فاسدين وحبة فقرا يا حرام حيفجروا المجتمع.
زهقت من ان واحد يدخل الفيلم، يدفع عشرين جنية ويخرج متأثر ويحس كده انوا مناضل عشان بيتفرج علي افلام خالد يوسف.
اسفة علي الاطالة .. بس متنكورش اني نظريتي كانت صحيحة.
عدد واحد مشهد اغتصاب. عدد واحد مشهد تعذيب,, عدد واحد مواطنين بسطاء، ورقصني يا جدع

Saturday, January 05, 2008

القي الماضي اللي عدي علي الحاضر يستعدي


ليلاتي في الميعاد دة........... ينعاد عمري اللي عدا
و القي الماضي اللي عدا ..... علي الحاضر يستعدي
و الحزن في قلبي دخره....و الطير ناح فوق سطوحي
و يا ابويا علي الليل و اخره......لما تصحي جروحي


انا كمان عندي مشكلة اني ما بانساش ، كنت دايما افكر نفسي بالحاجات المؤلمة اللي حصلت لي، القسوة من اللي المفروض يحنوا عليا،بعد اللي بحبهم، المقالب اللي باخدها بشكل متتالي ، و غبائي اللي بيسهم بنجاح منقطع النظير في نجاح كل المقالب


كنت دايما حاسة اني الالم و الوجع اللي جوايا هو اللي ها يمشيني و يساعدني اعيش بكرة من غير ما احس بنفس الالم دة تاني

بس بما اني فكيكة و ناصحة اوي ،

اكتشفت اني مش باعمل اي حاجة غير اني باجتر الاحزان مرة وراء مرة ، و باوقف حياتي عند اسخف لحظاتها ومش بافرح بالجديد الحلو اللي في حياتي ، انا مش باعدي من المواقف الوحشة ، بافضل شايلاها علي ضهري و كل اللي حواليا بيعدوا و لا ما بيعدوش خلني في نفسي


انا بقي قررت اول قرار في 2008،

اني هابطل السجاير و اكون انسان جديد، لا قصدي اني هاحاول ابطل افتكر القسوة و الحاجات الوحشة ، هاتعلم اقلب الصفحة ، انا في العادي باقطع الصفحة و باقطع رقبة اللي فيها لو مضايقني ، بس انا قررت ارحم الناس و ارحم نفسي، يمكن انا اللي حابسة نفسي جوة الحزن دة من غير داعي و من غير اي فايدة

هذة التدوينة من وحي تدوينة خلود الاخيرة و المقطع جزء من مقدمة مسلسل الليل و اخره
فاطمة

Labels:

Tuesday, January 01, 2008

خلصت 2007








اخيرا خلصت 2007
وبالرغم من عدم تفائلي خالص ب 2008
الا اني بحاول اتعامل مع الموضوع ان في صفحة مشخبطة بتتقلب
2007 شهدت كم احداث درامية غير طبيعية
كانت قصيرة اوي بس حصلت فيها حاجات كتير اوي
بس الغريب ان كل حاجة من برة تبان زي ماهي
بس جوايا في حاجات كتيييييييييير اوي اتغيرت
البدروم اتفتح اكتر من مرة
وفي كل مرة كان وفي كل مرة كان بتفتح فيها كان بيموت حاجات وبيطلع حاجات جديدة
كل عفاريتي بلا استثناء صحيت في 2007
كان فيها كم وجع غير طبيعي
والغريب ان ده مش عندي بس .. بس كان عند كل الناس اللي انا اعرفهم في حياتي
كلهم صحيت عفريتهم في 2007
مش عارفة ليه بجد
بس كلنا اتغيرنا اوي خلال السنة دي
ودلوقتي في سيناريوهين
الاول : ان السنو كانت نحس وخلصت وخلاص، وان السنة اللي فاتت كبرتنا ونظفت البدروم شوية ، وده ممكن يخلي في احتمال ان 2008 تكون احسن
السيناريو الثاني: ان البدرومات لسه زحمة، والعفاريت لسه في طريقها نحو السطح
وده حيخلي 2008 اسوء ..
مش عارفة طول عمري كنت بحس ان كل سنة ليها تيمة معينة كده من الاحداث، واما بيجي يوم راس السنة اقنع نفسي انها خلصت بكل اللي فيها ، وحاول اقلب الصفحة
بس السنة دي الوضع مختلف ، مش عارفة اقلب الصفحة ، اول مرة في حياتي محش اوي حاجة في الدنيا والساعة بتدق 12
يمكن عشان المرة دي التيما مختلفة ، الاحداث من جوانا اوي ، ودي بيخلي قلب الصفح اصعب

وكل سنة وانتوا طيبين